Yaponiye xitayni sherqiy déngizda tebi'iy gaz qézish mesilisi boyiche agahlandurdi
2005.10.07
Yaponiye soda ministiri jüme küni béyjing da'irilirini agahlandurup, eger xitaylar igilik hoquqi talash tartishtiki sherqiy déngiz rayonida tebi'iy gaz turubisi yatquzsa, yaponiyining "qaramlarche heriket" qollinidighanliqini bildürdi.
Soda ministiri soychi nakagawaning tekitlishiche, yaponiye xitay paraxotlirining tebi'iy gaz turubilirini talash - tartishtiki rayon'gha yötkewatqanliqini bayqap, béyjing hökümitidin buninggha chüshenche bérishni telep qilghan bolsimu, emma xitay da'iriliridin hazirghiche jawab alalmighan.
Soychi nakagawa, xitaylarning herikitini "choqum yéqindin közitishimiz kérek" dédi. U, xitaylar rayondiki ikki tebi'iy gaz quduqidin shangxeyge néfit tartiwatidu, dep qariliwatqanliqini bildürgen.
Yaponiye ötken ayda xitaylarning tyenweytyen arallirida tebi'iy gaz qézish meshghulati élip barghanliqi munasiwiti bilen béyjing hökümitige naraziliq bildürgen. Bu jay yaponiye igilik hoquqi barliqini jakarlighan arallargha xoshna bolup, yaponiye néfit zapisini xitaylarning sümürüp kétishidin endishe qilmaqta idi. Emma xitay hökümiti bu jaylarda teb'iy gaz qézish hoquqi barliqida ching turdi.
Yaponiye 9 - ayda xitay bilen söhbet ötküzüp, talash - tartishtiki rayonda tebi'iy gaz qézish meshghulatini birge élip bérishni telep qilghan. Xitaylar yaponiyining telipige 10 - otturilirida jawab béridighanliqini bildürgen idi. (Erkin)
Munasiwetlik maqalilar
- Yaponiye xitayni "söhbetni qesten keynige süriwatidu" dep eyiblidi
- Yaponiye bilen xitay taqim arallar mesilisi boyiche söhbet ötküzdi
- Xitay talash - tartishtiki sherqiy déngiz rayunigha herbiy paraxutlirini ewetti
- Yaponiye bilen xitay sherqiy déngizdiki talash - tartishlar toghrisida söhbet élip baridu
- Xitaydin kélidighan hujum tehditi yaponiye mudapi'e pilanida yer aldi