Yaponiye, shangxeydiki déplomatining özini öltürüwélish weqeside xitayni eyiblidi

Yaponiye charshenbe küni shangxeydiki bir neper déplomatining özini öltürüwélish weqeside xitayni eyiblep, xitay axbarat orunliri bu kishini yaponiyige a'it mexpiy höjjetlerni bérishke qistighanliqi üchün, uning özini öltürüwalghanliqini bildürdi.

Yaponiye tashqi ishlar ministirliqining bayanatchisi yoshinori katori, 40 nechche yashlardiki bu déplomatning ötken yili 5‏- ayda özini öltüriwalghanliqini, hemde u ölüshtin burun qaldurghan xétide buning sewebini éytqanliqini bildürdi. Bu déplomat xétide, ilgiri uning shangxeydiki bir kara ok naxshixanisidiki ayal mulazimetchi bilen bolghan munasiwiti sewebidin xitay hökümitining mushuni bahani qilip uninggha tehdit ishletkenlikini yazghan.

Shundaqla bu déplomat yaponiyining mexpiy alaqe xadimi bolup, xitay axbarat organliri buningdin paydilinip uni mexpiy höjjetlerni xitaygha bérishke qistighan. Yaponiye tashqi ishlar ministirliqining bayanatchisi xitay da'irilirining bu herikitini eyiblep, buning xelq'ara wéna shertnamisidiki déplomatik alaqe belgilimilerge xilap qilmish ikenlikini körsetti.

Yaponiyidiki kyodo agéntliqining xewer qilishiche, yaponiye tashqi ishlar ministirliqi bu heqtiki naraziliqini seyshenbe küni xitayning yaponiyidiki bash elchisi wang yigha yetküzgen. Emma xitay da'iriliri hazirghiche bu heqte héchqandaq inkas qayturmidi. (Peride)