Yaponiye: xitay sherqiy asiyani turaqsizliq girdabigha élip kelmekte

Yaponiye mudapi'e ministirliqi tarmiqidiki döletlik mudapi'e tetqiqat instétoti teripidin élan qilin'ghan bir istratégiye doklatida, xitayning künséri köpiyiwatqan herbiy küchi we bu döletning teywen'ge qaratqan siyasiti sherqiy asiya rayonini turaqsizlashturidighan eng muhim amillar hésablinidu, déyilgen.

Yaponiye bash ministiri junihiru koyzumining tokyodiki yasukuni buzruggahini ziyaret qilishi bilen yiriklishishke bashlighan xitay we yaponiye munasiwetliri, künséri jiddiyleshmekte. Xitay hökümiti yasukuni buzruggahini yaponiye militarizimining bir simwoli dep qarimaqta. Chünki bu qebristanliqqa ikkinchi dunya urushida qurban bolghan yaponiye puqraliri bilen birlikte ikkinchi dunya urushini qozghighan yapon herbiy générallirimu kömülgen.

Yaponiye döletlik mudapi'e tetqiqat inistituti 27‏-mart küni élan qilghan yilliq istratégiye doklatida, xitayning herbiy küchini dawamliq köpeytip, teywen'ge qaratqan bésimini kücheytishi, sherqiy asiya rayonini turaqsizliq girdabigha élip baridighan eng muhim amillar hésablindighanliqini tekitlidi.

Doklatta, xitay hökümitining teywen etrapigha orunlashturghan qisqa musapilik bashqurulidighan bombilirining sanini köpeytkenliki, ötken yili xitayning rusiye bilen birlikte ötküzgen herbiy manéwirlirining asasen teywenni nishan qilghanliqi körsitilgen.

Doklatta shundaqla, gerche béyjing hökümiti teywenni tinchliq yolida chong quruqluq bilen birleshtürüshke tirishidighanliqini tekitlisimu, emma teywenning musteqilliqining aldini élish üchün déngiz we hawa armiyisini kücheytip, yadro qorallirini tereqqi qildurmaqta déyilgen.

Xitay hökümiti yéqinda 2006‏- yilliq herbiy xamchotini 7. 14 Pirsent köpeyitkenlikini jakarlidi. Xitay hökümitining herbiy xamchotini köpeytkenliki, yaponiye qatarliq döletlerni endishilendürmekte. (Qanat)