Yaponiye bilen xitay urush qurbanliri qebristanliqi mesiliside yene birlikke kelmidi

Yaponiye bilen xitayning tashqi ishlar ministirliri bu yil ichide tunji qétim söhbet üstilige qaytip kelgen bolsimu, lékin yenila yaponiye bash ministirining urush qurbanliri qebristanliqini ziyaret qilish mesiliside birlikke kélelmidi.

Amérika birleshme agéntliqining melum qilishiche, yaponiye tashqi ishlar ministiri taro aso bilen xitay tashqi ishlar ministiri li jawshing seyshenbe küni qatarda ötküzülgen xelq'ara iqtisadiy yighini munasiwiti bilen qayta söhbet üstilige kelgen. Emma bu söhbet yenila urush qurbanliri qebristanliqi mesilisidiki ixtilap seweblik netijisiz axirlashqan.

Söhbettin kéyin li jawshing, yaponiye bash ministirining ikkinchi dunya urushida qaza qilghan eskerlerning qebristanliqini ziyaret qilishining toghra emeslikide ching turidighanliqini tekitlidi. Yaponiye bolsa, ikki terepning mesilide oxshimighan pikirde bolushining normal ehwal ikenlikini bildürüp, gerche bu ixtilap hel bolmisimu, lékin yaponiyining xitay bilen dawamliq söhbetlishishni xalaydighanliqini esketti.

Yaponiyidiki yasukuni urush qurbanliri qebristanliqigha yaponiyining ikkinchi dunya urushida qaza qilghan 2 yérim milyon'gha yéqin eskiri kömülgen bolup, yaponiye bash ministiri ularni urush qehrimanliri dep süpetleydu. Emma xitay da'iriliri yaponiye ikkinchi dunya urushi mezgilide xitayning bir qisim jaylirini bésiwalghanliqi üchün, ularni urush jinayetchiliri dep qarap, yaponiye emeldarlirining u yerni ziyaret qilishigha qarshi chiqip keldi. (Peride)