Xitay, yaponiyining sherqiy déngizda tebi'iy gaz qézishni toxtitish teklipini ret qildi

Xitay hökümiti yaponiyining sherqiy déngizdiki igilik hoquqi talash tartishtiki rayonlarda teb'iy gaz qézishni toxtitish teklipini ret qildi. Emma her ikkila terep dawamliq söhbet élip bérishke qoshulghan.

Yaponiye hökümiti xitaylarning talash - tartishtiki rayonlarda néfit - tebi'iy gaz qézish meshghulatini toxtitip, yaponiyini xitayning mezkur rayondiki énérgiye meshghulat pilani bilen teminleshni telep qilghan. Emma xitay tashqi ishlar ministirliqining bayanatchisi kong chü'en, jonggoning bu rayonlarda meshghulat élip bérish hoquqi bar, chünki bu jonggo déngiz tewekilidiki jaylar, dep körsetti.

Yaponiye söhbet ömiki düshenbe küni béyjingda xitaylar bilen sherqiy déngizda néfit - teb'iy gaz qézish mesilisi boyiche söhbet bashlidi. Xitay terep talash tartishtiki rayonda néfit we tebi'iy gazni teng qézish teklipini otturigha qoyghan. Emma yaponiye söhbet ömikining bashliqi kénichiro saséy, xitayning terepning bu teklipni ret qildi.

Yaponiye kyuto axbarat agéntliqining xewer qilishiche, ikki terep otturidiki iqtisadi rayonlar chégrisini ayrish üchün xizmet guruppisi qurushqa maqul bolghan. Sherqiy déngizda néfit we tebi'iy gaz qézish mesilisidiki ixtilaplar shundaqla yaponiyining 2 - dunya urushidiki ishghaliyechilik herikitini tonush mesilisi, xitay - yaponiye munaswitini ötkürleshtüriwetken idi.

Yéqinda xitayning mu'awin bash ministiri wu yi yaponiyidiki ziyaritini yérim yolda toxtutup, yaponiye bash ministiri koyzumi bilen körüshüsh pilanini bikar qilghan. Bu yaponiye - xitay munasiwitige ilgirligen halda soghuq su sepken idi. (Erkin)