Японийә хитайға беридиған малийә ярдимини кечиктүрди


2006.03.23

Хитай билән мунасивәтлири күнсери йериклишиватқан японийә, хитайға беридиған малийә ярдимини кечиктүрди. японийә ташқи ишлар министирлиқиниң баянатчиси, японйә һөкүмитиниң бу мәсилә үстидә қарар бериш үчүн көпрәк вақитқа еһтияҗи бар, деди.

японийә- хитай мунасивәтлиридә 2001- йилидин йәни японийидә баш министири җуничиру койзуми һакимийәт бешиға келип, токйодики иккинчи дуня уруши қурбанлири көмүлгән ясукони бузрукгаһини зиярәт қилишқа башлиғандин бери көрүнәрлик арқиға чикиниш көрүлмәктә.

Көпчиликкә мәлум болғандәк, хитай қатарлиқ бәзи дөләтләр ясукуни бузрукгаһини японийә милитаризминиң символи дәп қаримақта. Чүнки бу қәбристанлиққа иккинчи дуня уруши җәрянида қурбан болған икки милйон японийә пуқрасидин башқа йәнә бу урушни қозғиған японийә генераллириму көмүлгән.

Хәвәрләргә қариғанда, хитай билән японийә оттурисида араллар вә әтрапидики нефит мәнбәлири үстидә мәвҗут талаш- тартишлар, райондики тәсир күчини көпәйтиш үчүн риқабәтлишиш бу икки дөләт мунасивитиниң җиддийлишишигә сәвәб болмақта.

Хитай ташқи ишлар министирлиқиниң баянатчиси чиң гаң японийә һөкүмитиниң хитайға малийә ярдимини кечиктүрүш қарариға инкас қайтуруп, японийиниң җуңгоға бәргән малийә ярдими җуңгониң иқтисадий вә иҗдимаий тәрәққиятида муһим рол ойниған. японийиму буниңдин мәнпәәтләнди. Биз икки дөләтниң мәвҗут мәсилиләрни сөһбәт арқилиқ бир тәрәп қилалайдиғанлиқиға ишинимиз, деди. (Қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.