Yawropa parlaménti xelq'ara olimpik komitétini kishilik hoquqi mesiliside xitaygha bésim ishlitishke chaqirdi

Yawropa parlaménti peyshenbe küni qarar maqullap, xitay kishilik hoquqi xatirisining tereqqiyatidin endishe qiliwatqanliqini we xelq'ara olimpik komitétidin béyjingning olimpik yighinida kishilik hoquqni yaxshilash heqqidiki wedisini emeliyleshtürüshte diqqet qilishni telep qildi.

Yawropa parlaméntidiki mutleq köpchilik ezalarning qollap awaz bérishi bilen maqullan'ghan qarar layihiside, yawropa komitétini olimpik mezgilide xitaygha kishilik hoquqni yaxshilash toghrisida yiterlik bésim ishletmidi, dep eyibligen. Qarar layihiside yene, yawropa parlaménti olimpik musabiqisining yétip kélishige egiship, kishilik hoquqni qoghdighuchilar, muxbirlar, adwokatlar we közetküchilerge siyasi ziyankeshlik qilish heriketlirining küchiyiwatqanliqidin endishe hés qiliwatqanliqi shundaqla "olimpik musabiqisida kishilik hoquq tuyghunluqi téximu köp diqqet-étibargha érishishi kérek," dep qaraydighanliqini eskertti. Qararnamida, xelq'ara olimpik komitétidin xitayning 2001 - yili olimpik musabiqisini talashqanda bergen wedilirige qanchilik emel qilghanliqigha baha bérishni telep qildi.

11 - Ayda yawropa parlamént ezasi pal shmit we xelq'ara olimpik komitétining bir emeldari, xelq'ara olimpik komitétini béyjing olimpik musabiqisidin burun xitay kishilik hoquqi ehwali toghrisida bayanat élan qilishqa ündeydighanliqini jakarlighan idi.

Yawropa parlaméntining mu'awin re'isi édward mikmilan-skot, bu heqtiki bayanatida " xitayning öktichilerge wehshilerche ziyankeshlik qilish herikitidin azablan'ghanliqini" tekitligen. Lékin, béyjing hökümiti bu heqtiki tenqidlerni ret qilip, xitay kishilik hoquqi xatirisining kündin - kün'ge yaxshiliniwatqanliqini ilgiri sürmekte. (Erkin )