Xitay- yaponiye munasiwitining pat arida eslige kélishi mölcherlenmekte

Yaponiye tashqi ishlar ministiri machimura, yaponiye- xitay dölet rehberlirining pat arida ikki döletning barghansiri yiriklishiwatqan munasiwitini eslige keltürüshige ishinidighanliqini bildürdi.

Uning peyshenbe küni hindonéziyining jakarta shehiride muxbirlarning ziyaritini qobul qilghanda bildürüshiche, xitay dölet re'isi xu jintaw bilen yaponiye bash ministiri yunichiro koyzomi jüme küni jakartada ötküzilidighan asiya- afriqa dölet rehberlirining yighinigha qatnishish pursitidin paydilinip, ikki terep munasiwiti heqqide söhbet ötküzidiken.

Yaponiye bash ministiri yunichiro koyzomi jakartagha yolgha chiqishning aldida, "eger ikkila terep xitay bilen yaponiyining dostluqigha ehmiyet berse, bu qétimqi yighin intayin ehmiyetlik bolidu" dep bildürgen.

Yéqinqi üch heptidin buyan, xitayning her qaysi jaylirida, yaponiyining yéngi tarix derslikini testiqlighanliqi we b d t bixeterlik kéngishining da'imiy ezasi bolush mesilisige qarshi keng kölemlik namayishlar yüz bergen. Bezi namayishlarda zorawanliq weqeliri kélip chiqqan. Ikki dölet munasiwitimu buning bilen intayin nacharlashqan idi.

Bu arida, xitay hökümiti peyshenbe küni qayta bayanat élan qilip, puqralardin yaponiyige qarshi her qandaq namayish oyushturmasliqni telep qildi. Emma teywen merkizi axbarat agéntliqining xewer qilishiche, xitayning tor betliride nöwette 1 - may emgekchiler bayrimi we 4 - may yashlar bayrimi munasiwiti bilen yaponiyige qarshi yene keng kölemde namayish ötküzüsh heqqidiki chaqiriqlar tarqalmaqta iken. (Arzu)