Xitaydin import qilin'ghan zeherlik yémeklikler amérika metbu'atlirining qattiq diqqitini qozghimaqta

Xitaydin import qiliniwatqan haywanatlar yémeklikide zeherlik maddilar terkibi bolghanliqtin, nurghunlighan öy haywanlirining ölüshini keltürüp chiqarghan. Bu heqtiki uchurlar amérika metbu'atlirining shundaqla mezkur jaydiki xelqning qattiq diqqitini qozghimaqta. Amérika gézitliride bériliwatqan bu heqtiki melumatlarda körsitilishiche, xitay hökümet da'iriliri bu heqtiki uchurlarni qattiq kontrol qilish bilen bir waqitta, zeherlik yémeklikler tüpeyli kélip chiqqan öy haywanlirining ölüp kétish hadisilirige ta hazirghiche, éniq inkas bildürmigen.

Xewerde éytilishiche, xitaydin import qilin'ghan zeherlik yémeklikler tüpeyli kélip chiqqan hadisiler ashkarilan'ghandin kéyin, xitay da'iriliri tashqi dunyagha " bu peqet bir qisim qanunsiz qurulghan zawutlar teripidin ishlepchiqirilghan yémeklikler bolup, munasiwetlik orunlar bu heqte bir yürüsh chare - tedbirlerni qollanmaqta" dep bildürgen.

Gerche xitay hökümiti amérika yémeklikler tekshürüsh ömikining bu heqte xitaygha bérip tekshürüsh élip bérishigha maqul bolghan bolsimu, tekshürüsh ömigidikilerning xitayda munasiwetlik shirket xadimliri bilen biwaste süzlishish yaki körüshüshige ruxset qilmighan.

Amérika awazi radi'osining ziyaritini qobul qilghan xitay obzorchisi lyu shiyu " xitaydiki zeherlik yémeklikler peqet haywanatlar yeydighan yémekliklernila emes, belki insanlar yeydighan yémekliklernimu öz ichige alidu. Bu xil zeherlik yémekliklerning köplikidin,xitay puqraliri uningdin anche ejeplenmeydighan bolup qaldi" dep bildürgen.

Nyuyork waqit gézitide bérilgen bu heqtiki melumatta körsitilishiche, gerche xitaydin import qilin'ghan zeherlik yémeklikler heqqidiki xewerler amérikida zor ghulghula qozghighan bolsimu, xitayda, köp sandiki kishiler ta hazirghiche buningdin toluq xewerdar bolmighan. Chünki xitay teshwiqat ministirliqi bu heqte xelqqe héchqandaq melumat bermeslikni buyruq qilghan. (Méhriban)