Хитай зәһәр әткәсчиси америкида қолға чүшти


2007.07.25
Share on WhatsApp
Share on WhatsApp

Америка зәһәрлик чекимликкә қарши туруш идариси 44 яшлиқ хитай дора содигири йе җенлини қолға алди.

Йе әслидә шаңхәйдә туғулған болуп, кейин мексикида олтурақлишип қалған вә бир дора ширкити ечип дора содиси билән шуғулланған һәм мексика ширкәтлиригә адәмниң нервисини тормузлап сараңларчә роһландуридиған бир хил зәһәрлик дора ишләпчиқиришқа ишлитидиған химийилик мадда метапемтаминни көпләп сатқан.

Бу йил март ейида сақчилар униң мексика шәһиридики һәшәмәтлик дачисиға бастуруп кирип өйидин 270 милйон америка доллири нәқ пулни қолға чүшүргән. Америка һөкүмити буни "дунядики зәһәр әткәсчиликкә аит әң коп нәқ пул қолға чүшкән дило "дәп атиған.

25- Июл вашингтон пост гезитидә берилгән хәвәрдә көрситилишичә, у америкиниң мариланд штати вестфийлд веатон сода сарийида қолға чүшкән.

Хәвәрдә көрситилишичә, йе җенлиниң мексикиға қурған дора ширкити қанунсиз һалда 86 тонна чәкләнгән химийилик маддини мексикиға импорт қилған.

Униң адвокатиниң сотхана алдида ейтқанлириға қариғанда , йе мексикиниң һакимийәт бешидики партийә миллий һәрикәт партийисиниң зиянкәшликигә учриған болуп, униң қолға елиниши, мексика рәһбәрлири тәрипидин " алдин орунлаштурулған көз боямчилиқ билән елип берилған зәһәр әткәсчиликигә зәрбә бериш һәрикити" икән.

Әмма америка зәһәргә қарши туруш идарисиниң баянатчиси, өзлириниң йени қанун ториға чүшүрүштә испат материялларни интайин тәпсилий вә еһтиятчанлиқ билән тәкшүрүп бир тәрәп қилғанлиқини билдүрүп: "биз тәкшүрүшни бәк тәпсилий елип бардуқ" дәйду.

Йе җенли һазир зәһәрлик чекимликсиман дора ефедрин қатарлиқларни ишләпчиқириш, қанунсиз қорал сақлаш вә қанунсиз һәрикәтләр билән шуғуллиниш қатарлиқ җинайәтләр билән әйибләнди. Һазир йе җенлиниң делоси давамлиқ тәкшүрүш вә сот қилиш басқучида турмақта. (Җүмә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт