Японийидә тоңлитилған хитай җувависидин зәһәрләнгән адәм сани 200 дин ашти


2008-01-31
Share

японийә һөкүмәт даирилири чаршәнбә күни, хитайниң тоңлитилған җувавиисидин зәһәрләнгән японийиликләр саниниң 10 ға йәткәнликини ашкарилиғандин кейин, японийә телевизийә вә мәтбуатлири пәйшәнбә күнигә қәдәр зәһәрләнгән адәм саниниң 200 дин ашқанлиқини елан қилди.

японийә һөкүмити пәйшәнбә күни җиддий йиғин чақирип, хитайниң тоңлитилған җувавиисиға йеза игиликидә һашарәтләрни йоқитиш үчүн ишлитилидиған метамидофусниң арилишип қелишидин келип чиққан зәһәрлиниш сәвәбини тәкшүрүшни қарар қилди. Буниң билән биргә японийә һөкүмити йәнә,мәхсус хадимлирини хебей өлкилик тәняң йимәклик ишләпчиқириш ширкитигә нәқ мәйданда тәкшүрүш елип беришқа әвәтти.

японийә мәтбуатлириниң билдүрүшичә, зәһәрлик җувава тоғрисидики хәвәр, пүтүн японийә җәмийитидә ғулғула қозғап, японлуқларниң хитайдин импорт қилинған йимәкликләргә болған ишәнчисини йоқатқан.

Нөвәттә, японийиниң бир қисим өлкилири, тәняң йимәклик ширкитиниң йимәкликлирини импорт қилған японийә ширкәтлиридин 19 иниң исимликини елан қилип, бу ширкәтләрдин пүтүн хитай йимәкликлирини қайтуривитишни вә тәняң йимәклирини сетишни тохтитишни тәләп қилған.

Бирақ, хитай дөләтлик сүпәт тәкшүрүш идариси тоңлитилған җувава үстидә елип барған тәкшүрүштә, зәһәрлик метамидофусни байқимиғанлиқини тәкитләп, узун йиллиқ тарихқа игә тәняң ширкитиниң мәһсулат ишләпчиқиришта бихәтәрликкә алаһидә әһмийәт беридиғанлиқини билдүргән.

Һазир икки тәрәп, бу мәсилә үстидә өз алдиға җиддий тәкшүрүш елип бармақта. (Әқидә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт