Yaponiyide tonglitilghan xitay juwawisidin zeherlen'gen adem sani 200 din ashti

Yaponiye hökümet da'iriliri charshenbe küni, xitayning tonglitilghan juwawi'isidin zeherlen'gen yaponiyilikler sanining 10 gha yetkenlikini ashkarilighandin kéyin, yaponiye téléwiziye we metbu'atliri peyshenbe künige qeder zeherlen'gen adem sanining 200 din ashqanliqini élan qildi.

Yaponiye hökümiti peyshenbe küni jiddiy yighin chaqirip, xitayning tonglitilghan juwawi'isigha yéza igilikide hasharetlerni yoqitish üchün ishlitilidighan métamidofusning ariliship qélishidin kélip chiqqan zeherlinish sewebini tekshürüshni qarar qildi. Buning bilen birge yaponiye hökümiti yene,mexsus xadimlirini xébéy ölkilik tenyang yimeklik ishlepchiqirish shirkitige neq meydanda tekshürüsh élip bérishqa ewetti.

Yaponiye metbu'atlirining bildürüshiche, zeherlik juwawa toghrisidiki xewer, pütün yaponiye jem'iyitide ghulghula qozghap, yaponluqlarning xitaydin import qilin'ghan yimekliklerge bolghan ishenchisini yoqatqan.

Nöwette, yaponiyining bir qisim ölkiliri, tenyang yimeklik shirkitining yimekliklirini import qilghan yaponiye shirketliridin 19 ining isimlikini élan qilip, bu shirketlerdin pütün xitay yimekliklirini qayturiwitishni we tenyang yimeklirini sétishni toxtitishni telep qilghan.

Biraq, xitay döletlik süpet tekshürüsh idarisi tonglitilghan juwawa üstide élip barghan tekshürüshte, zeherlik métamidofusni bayqimighanliqini tekitlep, uzun yilliq tarixqa ige tenyang shirkitining mehsulat ishlepchiqirishta bixeterlikke alahide ehmiyet béridighanliqini bildürgen.

Hazir ikki terep, bu mesile üstide öz aldigha jiddiy tekshürüsh élip barmaqta. (Eqide)