Хитай " җувава делоси" ни тәкшүрүш өмики японийидә иш башлиди


2008.02.03

Йеқинда японийидә 200 дин артуқ японлуқниң хитайниң тоңлитилған җувавилиридин зәһәрлиниш вәқәси түпәйлидин, бу икки дөләт даирилири арисида ихтилап келип чиққан иди. японийә даирилири хитайдин киргүзүлгән мәзкур җувавиларда зәһәрлик мадда барлиқини корситишкән һәмдә японийигә хитай йемәклирини импорт қилмаслиқ пикирлири кәң әвҗи елишқа башлиған иди.

2-Айниң 3-күни хитайниң сүпәт тәкшүрүш идарисиниң бир вәкилләр өмики японийигә йетип келип, мәзкур делони тәкшүрмәкчи болған. Б б с агентлиқиниң хәвәр қилишичә, хитай вәкиллири японийә әмгәк вә йемәкликкә мунасивәтлик әрбаблири билән көрүшүп сөһбәтләшкән.

Җувава мәсилисиниң бундақ җиддий муамилигә учриши шуки, японийә сақчилири хитайдин киргүзүлгән җувавиларни ориған материялдин мәлум зәһәрлик мадда тапқан болуп, бу вәқәдин кейин японийигә сетилидиған җувавиларға қәстән зәһәрлик маддилар орунлаштурулған дәйдиған қияслар пәйда болған. Әмма, хитай сүпәт тәкшүрүш даирилири бу әһвални рәт қилип, хитай йемәклири җүмлидин җувавиларниң сүпәт өлчимигә лайиқ икәнликини билдүрүшкән иди.

Мәлумки, йеқинқи йиллардин буян японийә-хитай мунасивәтлири җиддийлишип қалған, хитайда иккинчи җаһан уруши тарихиға, болупму, нәнҗиң қирғинчилиқиға мунасивәтлик вәқәләр түпәйлидин японларға қарши кәйпият әвҗи алған болса, японийидиму охшашла хитайға қарши туруш кәйпиятлири күчәйгән икән. (Үмидвар)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.