Японийә парламентидики затлар ясукуни бузрукгаһини зиярәт қилди

Хитай - японийә мунасивити сүркилиш басқучида туриватқан чағда, японийә парламентиниң 168 нәпәр әзаси вә парламент әзалириниң вәкили, токйодики 2 - дуня урушиниң қурбанлар зәрәтгаһлиқи- ясукуни бузрукгаһини зиярәт қилди. Әмма зәрәтгаһлиқни зиярәт қилғанлар ичидә койзуми һөкүмитидики министирлар йоқ икән.

японийә маарип министирлиқи, йеқинда японийиниң 2 - дуня урушидики ишғалийәт һәрикитини әйиблимәйдиған дәрслик китабни тәстиқлиғанлиқи үчүн, бу хитайда милләтчиләрниң японийигә қарши намайишини кәлтүрүп чиқарған. Намайишчилар хитайдики японийә әлчиханиси, япон рестуранлирини шундақла японийә карханилирини уруп чаққан иди. японийә парламент әзалириниң ясукуни бузрукгаһини зиярәт қилиш паалийити хитай һөкүмитиниң дәрһал наразилиқини қозғиди.

Әмма японийиликләр, ясукуни бузрукгаһини зиярәт қилиш, уруш җавапкарлирини сеғиниш әмәс, уруш җәрянида өлгән бигунаһ пуқраларниң роһиға дуа - тилавәт қилиш, дәп көрсәтмәктә.

Хитай ташқи ишлар министирлиқи " җоңго - японийә җидди әһвалда туриватқан бир чағда, биз японийидики бир қисим сиясәтчиләрниң мәсулийәтсизлик билән елип барған һәрикитигә қаттиқ етираз билдүримиз," дәп әскәртти.

Буниң сәл алдида бейҗиң һөкүмити хитай пуқралирини японийигә қарши намайишни тохтутуш тоғрисида агаһландурған. Хитай җамаәт хәвпсизлик министирлиқиниң бу һәқтики уқтурушида, пуқраларни "рухсәтсиз намайишларға қатнашмаслиқ, интернет вә қол телефон арқилиқ намайиш уюштурмаслиқ" тоғрисида агаһландуруп, " рухсәтсиз намайиш қилиш қанунсиз," дәп көрсәткән. японийә илгири бейҗиң һөкүмитини японийигә қарши намайишларни " астирттин қоллаш" билән әйиблигән иди. (Әркин)