Yaponiye parlaméntidiki zatlar yasukuni buzrukgahini ziyaret qildi

Xitay - yaponiye munasiwiti sürkilish basquchida turiwatqan chaghda, yaponiye parlaméntining 168 neper ezasi we parlamént ezalirining wekili, tokyodiki 2 - dunya urushining qurbanlar zeretgahliqi- yasukuni buzrukgahini ziyaret qildi. Emma zeretgahliqni ziyaret qilghanlar ichide koyzumi hökümitidiki ministirlar yoq iken.

Yaponiye ma'arip ministirliqi, yéqinda yaponiyining 2 - dunya urushidiki ishghaliyet herikitini eyiblimeydighan derslik kitabni testiqlighanliqi üchün, bu xitayda milletchilerning yaponiyige qarshi namayishini keltürüp chiqarghan. Namayishchilar xitaydiki yaponiye elchixanisi, yapon résturanlirini shundaqla yaponiye karxanilirini urup chaqqan idi. Yaponiye parlamént ezalirining yasukuni buzrukgahini ziyaret qilish pa'aliyiti xitay hökümitining derhal naraziliqini qozghidi.

Emma yaponiyilikler, yasukuni buzrukgahini ziyaret qilish, urush jawapkarlirini séghinish emes, urush jeryanida ölgen bigunah puqralarning rohigha du'a - tilawet qilish, dep körsetmekte.

Xitay tashqi ishlar ministirliqi " jonggo - yaponiye jiddi ehwalda turiwatqan bir chaghda, biz yaponiyidiki bir qisim siyasetchilerning mes'uliyetsizlik bilen élip barghan herikitige qattiq étiraz bildürimiz," dep eskertti.

Buning sel aldida béyjing hökümiti xitay puqralirini yaponiyige qarshi namayishni toxtutush toghrisida agahlandurghan. Xitay jama'et xewpsizlik ministirliqining bu heqtiki uqturushida, puqralarni "ruxsetsiz namayishlargha qatnashmasliq, intérnét we qol téléfon arqiliq namayish uyushturmasliq" toghrisida agahlandurup, " ruxsetsiz namayish qilish qanunsiz," dep körsetken. Yaponiye ilgiri béyjing hökümitini yaponiyige qarshi namayishlarni " astirttin qollash" bilen eyibligen idi. (Erkin)