Donald ramisfild öktebirde béyjingni ziyaret qilmaqchi

Xitayni ziyaret qiliwatqan amérika tinch okyan qoshunining bash qomandani wilyam falonning charshenbe küni ashkarilishiche, amérika dölet mudapi'e ministiri donald ramisfil bu yil 10 - ayda béyjingni ziyaret qilidu. Bu, ramisfildning xitaygha qilidighan tünji resmiy ziyariti bolup hésablinidu.

U, "biz bir yürüsh ziyaret pilanini orunlashturduq, aldi bilen men, kiler ayda dölet mudapi'e ministiri ramisfild, andin prézidént bush xitayni ziyaret qilmaqchi boldi" dep bildürdi.

Wilyam falon, amérika we xitay rehberliri arisidiki bu xil alaqining ikki dölet otturisidiki gumanlarni azaytip, munasiwetlerni yaxshilashqa paydiliq ikenlikini körsetti.

Donald ramisfild bashchiliqidiki amérika dölet mudapi'e ministiri bu yil 7 - ayda élan qilghan xitayning herbiy küchi heqqidiki doklatta, béyjingning herbiy qurulushni jiddiy kücheytiwatqanliqini bildürüp, xitayni asiyaning bixeterliki üchün bir tehdit dep körsetken idi.

Fransiye axbarat agéntliqining analizchilarning sözini neqil keltürüshiche, yéqinqi yillardin buyan, xitay we amérika otturisidiki herbiy alaqe eslige kélishke bashlighan bolsimu, emma ikki terepning teywen mesilisi, yawrupa ittipaqining xitaygha qaratqan herbiy qoral cheklimisini bikar qilish mesilisi qatarliq nurghun mesililerde ixtilabi bar.

Xitayni ziyaret qiliwatqan wilyam falon, xitayning amérika iqtisadiy we herbiy jehettin xitayni boghushqa uruniwatqan bolushi mumkin dégen endishilirige reddiye bérip, ikki terepning téximu ochuq- yoruq alaqe ornitishining intayin muhimliqini tekitligen. (Arzu)