خەلقئارا كەچۈرۈم تەشكىلاتى خىتاينىڭ 4 - ئىيۇن مەھبۇسلىرىنى قويۇپ بېرىشكە چاقىردى

خەلقئارا كەچۈرۈم تەشكىلاتى جۈمە كۈنى بايانات ئېلان قىلىپ، خىتاي ھۆكۈمىتىنى 4 - ئىيۇن ۋەقەسىدە تۈرمىگە تاشلانغان شۇنداقلا 4 - ئىيۇن ۋەقەسىنى ئاقلاشنى تەلەپ قىلغانلىقى ئۈچۈن قولغا ئېلىنغان كىشىلەرگە قايتىدىن باھا بېرىشنى تەلەپ قىلدى.

كەچۈرۈم تەشكىلاتىنىڭ باياناتى تيەنئەنمىن دېموكراتىيە ھەرىكىتى 1989 - يىلى 4 - ئىيۇندا خىتاي ئازادلىق ئارمىيىسى تەرىپىدىن باستۇرۇلغانلىقىنىڭ 16 يىللىقى مۇناسىۋىتى بىلەن ئېلان قىلىندى. كەچۈرۈم تەشكىلاتى، " خىتاي ھۆكۈمىتى تيەنئەنمىن ۋەقەسى توغرىسىدا پىكىر بايان قىلغانلار، ئىنتېرنېت ياكى باشقا ۋاستىلاردا ئۇچۇر ئالماشتۇرغان شەخسلەرنى قولغا ئېلىش ۋە كەمسىتىشنى توختىتىشى كېرەك،" دەپ كۆرسەتتى.

خىتاي رەھبەرلىرىنىڭ 4 - ئىيۇن ۋەقەسىگە كۆڭۈل بۆلۈش مودىدىن قالدى، دەپ قارايدىغانلىقىنى تەكىتلىگەن كەچۈرۈم تەشكىلاتى، خىتاي باش مىنىستىرى ۋېن جياباۋنىڭ " پەقەت تارىخقا ھۆرمەت قىلىدىغان، تارىخ ئالدىدا مەسئۇلىيەتچان دۆلەتلەرلا ئاسىيا ۋە دۇنيا خەلقىنىڭ ھۆرمىتىگە سازاۋەر بولالايدۇ،" دېگەن سۆزىنى خاتىرلەتتى. ۋېن جياباۋ بۇ سۆزنى ياپونىيىنىڭ 2 - دۇنيا ئۇرۇشىدىكى ئىشغالىيەتچىلىك ھەرىكىتىنى تەنقىد قىلغاندا ئېيتقان. ئەمما خىتاي ھۆكۈمىتى تيەنئەنمىن دېموكراتىيە ھەرىكىتىنى ئاقلاشنى رەت قىلدى.

خىتاي تاشقى ئىشلار مىنىستىلرىقىنىڭ باياناتچىسى كوڭ چۈئەن، ھەر قايسى جەھەتلەردىكى تەرەققىيتاتلار ھۆكۈمەتىنىڭ 4 - ئىيۇن ۋەقەسى توغرىسىدىكى يەكۈنىنىڭ توغرىلىقىنى ئىسپاتلىماقتا، دەپ كۆرسەتتى.

فرانسىيە ئاخبارات ئاگېنتلىقىنىڭ خەۋەر قىلىشىچە، خىتاي ھۆكۈمىتى 4 - ئىيۇن ۋەقەسىنىڭ 16 يىللىقى ھارپىسىدا، ئۆكتىچىلەرنى نازارەت قىلىشنى كۈچەيتكەن. (ئەركىن)