Хәлқара кәчүрүм тәшкилати хитайниң 4 - июн мәһбуслирини қоюп беришкә чақирди

Хәлқара кәчүрүм тәшкилати җүмә күни баянат елан қилип, хитай һөкүмитини 4 - июн вәқәсидә түрмигә ташланған шундақла 4 - июн вәқәсини ақлашни тәләп қилғанлиқи үчүн қолға елинған кишиләргә қайтидин баһа беришни тәләп қилди.

Кәчүрүм тәшкилатиниң баянати тйәнәнмин демократийә һәрикити 1989 - йили 4 - июнда хитай азадлиқ армийиси тәрипидин бастурулғанлиқиниң 16 йиллиқи мунасивити билән елан қилинди. Кәчүрүм тәшкилати, " хитай һөкүмити тйәнәнмин вәқәси тоғрисида пикир баян қилғанлар, интернет яки башқа вастиларда учур алмаштурған шәхсләрни қолға елиш вә кәмситишни тохтитиши керәк," дәп көрсәтти.

Хитай рәһбәрлириниң 4 - июн вәқәсигә көңүл бөлүш модидин қалди, дәп қарайдиғанлиқини тәкитлигән кәчүрүм тәшкилати, хитай баш министири вен җябавниң " пәқәт тарихқа һөрмәт қилидиған, тарих алдида мәсулийәтчан дөләтләрла асия вә дуня хәлқиниң һөрмитигә сазавәр болалайду," дегән сөзини хатирләтти. Вен җябав бу сөзни японийиниң 2 - дуня урушидики ишғалийәтчилик һәрикитини тәнқид қилғанда ейтқан. Әмма хитай һөкүмити тйәнәнмин демократийә һәрикитини ақлашни рәт қилди.

Хитай ташқи ишлар министилриқиниң баянатчиси коң чүән, һәр қайси җәһәтләрдики тәрәққийтатлар һөкүмәтиниң 4 - июн вәқәси тоғрисидики йәкүниниң тоғрилиқини испатлимақта, дәп көрсәтти.

Франсийә ахбарат агентлиқиниң хәвәр қилишичә, хитай һөкүмити 4 - июн вәқәсиниң 16 йиллиқи һарписида, өктичиләрни назарәт қилишни күчәйткән. (Әркин)