Xu jingtaw 1989 - yildiki dimukratiye herkitini aqlash pilani yoqliqini bildürdi

Xitay dölet re'isi xu jingtaw shenbe küni xitay da'irilirining 1989 - yildiki tiyen enmin meydani dimukratiye herkitini aqlash pilani yoqliqini bildürdi. Bu xu jingtawning 2002 - yili xitay komunistik partiyisi bash sékritarliqini, bu yil 9 - ayda xitay merkizi herbi ishlar komitéti re'islikini ötküziwalghandin béri tunji qétim tyen enmin dimukratiye herkitini tilgha élishi bolup hisaplinidu.

U bu mesilini fransiye prizidénti jak shirak bilen shenbe küni ötküzgen muxbirlarni kütüwélish yighinida tilgha aldi. Xu jingtaw, xitay azatliq armiyisining tyen enmin meydanidiki oqughuchilarni basturghanliqi üstide toxtilishtin özini qachurghan.

Biraq u, hökümetning 1989 - yili qollan'ghan toghra tedbiri, 1990 - yillardiki iqtisadi güllinishning asasini yaratti dep tekitlidi. U mundaq deydu : 10 yilliq xizmitimiz xitay jemiyitining siyasi jehettiki muqimliqi, islahat we ichiwétishning chongqurlashqanliqini körsetti. Xu jingtaw bu sözlerni bir muxbirning tyen enmin herkitini aqlash pilani bar - yoqliqi toghrisidiki su'aligha jawap bergende tekitligen. Xu jingtaw, " shunga bu yerde yuqirqi muxbir dostimiz tilgha alghan endishe qilghudek bir mesile mewjut emes " dep körsetti. Xu jingtawdin sirt bash ministir wén jyabawni öz ichige alghan xitay hökümet emeldarliri, tyen enmin dimukratiye herkitini basturush jeriyanida ölgenler a'ile tawabatining, tyen enmin weqesini aqlash toghrisidiki telipige yuqirqidek jawap bérip kelmekte. (Erkin)