Хитай адәм организими содисини чәклиди

Хитай сәһийә министирлиқи адәм организиминиң содисини мәний қилидиған йеңи бәлгилимә елан қилип адәм организимини елип сетишни чәклиди. Хитай дуня бойичә адәм организими содиси әң чап - чап вә бу җәһәттики түзүми әң бош дөләт һесаблиниду.

Йеңи бәлгилимә хитай сәһийә министирлиқиниң тор бетидә сәйшәнбә күни елан қилинди. Йеңи бәлгилимә бойичә адәм организимини елип - сетиш мәний қилиниш билән биргә, буниңдин кейин ички органларни көчүрүштә организимини ианә қилған кишиниң разилиқи елинған язма испати тәләп қилиниду. Бейҗиң һөкүмити хитайда ички организимларни көчүрүш содиси қанун бойичә елип бериливатқанлиқини вә буниң "қисмән даиридә" чәклиниватқанлиқини илгири сүрсиму, лекин кишилик һоқуқ тәшкилатлири ички организим содисиниң хитайда әң чап - чап базар һесаблинидиған вә инсан вижданини йиргәндүридиған бир содиға айланғанлиқини билдүрмәктә.

Гәрчә җуңго ички организим көчүрүш җәмийити 2003 - йили хитай бойичә тәхминән 5000 бөрәк вә 1500 җигәр көчүрүлгәнликини елан қилған болсиму, лекин зади қанчилик ички органниң көчүрүлгәнлики мәлум әмәс. Кишилик һоқуқ органлириниң әскәртишичә, хитайдин чәтәлгә чиқирилған инсан органлириниң көп қисими өлүм җазаси берилгән мәһбусларниң ички әзалири болуп, уларниң рухсити елинмиған. (Әркин)