Xitay adem organizimi sodisini cheklidi

Xitay sehiye ministirliqi adem organizimining sodisini men'iy qilidighan yéngi belgilime élan qilip adem organizimini élip sétishni cheklidi. Xitay dunya boyiche adem organizimi sodisi eng chap - chap we bu jehettiki tüzümi eng bosh dölet hésablinidu.

Yéngi belgilime xitay sehiye ministirliqining tor bétide seyshenbe küni élan qilindi. Yéngi belgilime boyiche adem organizimini élip - sétish men'iy qilinish bilen birge, buningdin kéyin ichki organlarni köchürüshte organizimini i'ane qilghan kishining raziliqi élin'ghan yazma ispati telep qilinidu. Béyjing hökümiti xitayda ichki organizimlarni köchürüsh sodisi qanun boyiche élip bériliwatqanliqini we buning "qismen da'iride" chekliniwatqanliqini ilgiri sürsimu, lékin kishilik hoquq teshkilatliri ichki organizim sodisining xitayda eng chap - chap bazar hésablinidighan we insan wizhdanini yirgendüridighan bir sodigha aylan'ghanliqini bildürmekte.

Gerche junggo ichki organizim köchürüsh jem'iyiti 2003 - yili xitay boyiche texminen 5000 börek we 1500 jiger köchürülgenlikini élan qilghan bolsimu, lékin zadi qanchilik ichki organning köchürülgenliki melum emes. Kishilik hoquq organlirining eskertishiche, xitaydin chet'elge chiqirilghan insan organlirining köp qisimi ölüm jazasi bérilgen mehbuslarning ichki ezaliri bolup, ularning ruxsiti élinmighan. (Erkin)