Xitayda ayal we balilarni sétish qilmishi ewj almaqta

Enxuy ölkilik aliy sot mehkimisi yéqinda, 6 neper birmiliq adem etkeschilirining ayallarni sétish jinayiti üstidin sot échip, ularni ayrim - ayrim halda müddetsiz we müddetlik qamaq jazasigha höküm qilghan.

Shinxu'a agéntliqining xewiride neqil keltürüshiche, ma eyley qatarliq 6 neper bérmiliq , 23 neper bérmiliq qizni xitaygha aldap élip kélip, oxshash bolmighan bahada bashqilargha sétiwetken.

Xewerlerdin melum bolushiche, chégra rayonidiki qolayliq shara'ittin paydilan'ghan adem bidikliri izchil türde xitay , bérma we wéytnam arisida ayal we balilarni sétish qilmishliri bilen shughullinip kéliwatqan bolsimu, emma xitay hökümiti öz döliti ichidiki adem bidiklirige yéterlik zerbe bérelmigen.

Adem bidikliri, wéytnam bilen chégrilinidighan gu'angshi ölkisi we bérma bilen chégrilinidighan enxuy ölkisini adem sodisi merkizi qiliwalghan, peqet 2005 ‏- yili gu'angshi ölkiside yüz bergen ayal we balilarni sétish dilosi 125 qétimgha yetken.

Uyghur siyasiy pa'aliyetchiliri, nöwette ishqa orunlashturush, mektepke orunlashturush bahanisida nurghunlighan Uyghur qizlirining , xitay ölkilirige aldap élip kétiliwatqanliqini, bolupmu xitayning bashqa döletler bilen chégrilinidighan rayonlirida bu ehwalning éghir ikenlikini inkas qilmaqta.

Közetküchiler, xitaygha sétilidighan ayal we balilarning asasliq wéytnam, mongghuliye, népal qatarliq dületlerdin élip kélinidighanliqini, xitay ayallirining bolsa asasliq tayland, malayshiya, sin'gapur we teywenlerge sétilidighanliqini shundaqla xitayning ayal we balilarni sétish jinayetliri barghanséri éghirlap dunya buyiche adem etkeschiliki eng éghir bolghan taylanttinmu éship kétishi mumkinlikini ilgiri sürmekte. (Eqide)