Xitay hökümiti puqralirini qanunsiz namayish ötküzmeslikke agahlandurdi


2005.04.15
Share on WhatsApp
Share on WhatsApp

Yaponiye tashqi ishla ministiri xitayni ziyaret qilishning harpisida, xitay hökümiti uqturush chüshürüp, puqralirini kéyinki bir nechche kün ichide yaponiyige qarshi hökümetning testiqidin ötmigen her qandaq namayish ötküzmeslikke agahlandurdi.

Roytiris agéntliqining xewirige qarighanda, xitayning her qaysi torbetliride jüme küni xitay jama'et xewpsizlik ministirliqining mezkur uqturushi élan qilin'ghan. Uqturushta, saqchi da'iriliri puqralar namayish ötküzüsh üchün choqum jama'et xewpsizlik organlirining ruxsitini élishi kéreklikini bildürüp, xilapliq qilghuchilarning jazalinidighanliqini agahlandurghan.

Xewerge qarighanda, xitay, yaponiye we jenubiy koriyining emeldarliri bu heptining axiri béyjingda yighin échip, öz- ara munasiwetlirini muzakire qilidu. Bu munasiwet bilen ,xitaydiki bir qisim pa'aliyetchiler her qaysi chong sheherlerde yaponiyige qarshi keng kölemde namayish ötküzüshni pilanlawatqan bolup, ular intérnét arqiliq kishilerni namayishqa chaqirmaqta.

Xitay hökümitining bu uqturush élan qilinishtin bir hepte ilgiri xitay puqraliri yaponiyining xitaygha hujum qilish tarixi heqqide özgertish kirgüzülgen tarix derslik kitabini maqullishi we b d t bixeterlik kéngishining da'imiy ezalirigha kirishige qarshi keng kölemde namayish ötküzgen. Namayishta hetta zorawanliq weqeler yüz bergen idi.

Bu arida, amérikining béyjingda turushluq bash elchixanisimu, xitaydiki amérika puqralirini xitayda bu heptining axiri ötküzilidighan yaponiyige qarshi namayishlardin hoshyar bolushqa chaqirip, yaponiyige qarshi namayishning chet'elliklerge qarshi namayishqa aylinip kétish éhtimalliqini bildürgen.(Arzu)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.