Dunya sehiye teshkilati xitayni eydiz késili toghrisida agahlandurdi

Dunya sehiye teshkilati seyshenbe küni dunya eydiz küni munasiwiti bilen bayanat élan qilip, xitayda 2010 - yilghiche eydiz wirusi bilen yuqumlan'ghuchilar 10 milyon'gha yétishi mumkin, dep agahlandurdi.

Dunya sehiye teshkilatining gherbiy tinch okyan rayoni mudiri shigeru omi bayanatida, xitayni öz ichige alghan asiya döletlirini eydizge qarshi yéterlik tedbir almaywatidu, dep eyiblidi. U, "biz némini qilish, nimini qilmasliq kéreklikini bilimiz, undaqta néme üchün eydiz wirusining tarqilishigha qarshi kéreklik tedbirlerni almaymiz?" deydu.

Roytérs axbarat agéntliqining ilgiri sürüshiche, xitayda eydiz wirusi pütün ölke we aptonom rayonlargha tarqalghan. Uyghur aptonom rayoni xitay boyiche eydiz wiruـsi eng köp tarqalghan rayon hésablinidu.

Xitay metbu'atliri rayonda eydiz késili we wirusi bilen yuqumlan'ghuchilar 60 mingdin ashidighanliqini bildürmekte. Amérika xelq'ara diniy erkinlik komitéti ötken ayda élan qilghan doklatida, xitay da'irilirining diniy sorunlarda eydizge qarshi qismen bolsimu teshwiqat élip bérishke bashlighanliqini " ijabiy bashlinish," dep bahalighan idi.

Dunya sehiye teshkilatidiki shigeru omi, zeherlik chékimlik chékidighanlar we pahishiler ـ eydiz wirusining tarqilishida yitekchilik rol oynawatqanliqini bildürdi. (Erkin)