Xitayda eydiz wirusi bilen yuqumlan'ghuchilar 650 mingdin ashidu

Xitay da'iriliri xitaydiki eydiz ehwali heqqide élip barghan yéngi tekshürüshige asasen, charshenbe küni bu heqtiki eng yéngi doklatini élan qilip, xitayda 2005‏- yilining axirighiche bolghan mezgilde eydiz wirusi bilen yuqumlan'ghuchilar sanining 650 ming ikenlikini élan qildi. Bu san ular 2 yil awal élan qilghan melumattin xéli az bolghan.

Dunya sehiye teshkilati charshenbe küni gerche xitay da'iriliri chiqarghan doklat boyiche, eydiz yuqumlan'ghuchilirining sani az bolsimu, lékin bu hergizmu eydiz ehwalida yaxshilinish bolghanliqidin dérek bermeydighanliqini , eksiche xitayda eydiz wirusi tarqilishining téximu éghirlishiwatqanliqini bildürdi.

Dunya sehiye teshkilatining xitaydiki wekili xenk békédem ( Henk Bekedam ), " 2003‏- yilida sanliq melumatning yuqiri bolushi peqet perezning yuqiri mölcherlinip ketkenlikidin bolghan, bu hergizmu hazir eydiz yuqumlan'ghuchilar sani azaydi dégenlik bolmaydu"dédi. U yene, ötken yili xitayda 70 ming kishining yéngidin eydiz wirusi bilen yuqumlan'ghanliqini éytti.

Xitay chiqarghan doklatta körsitilishiche, ötken yili xitayda 25 ming kishi eydiz késili bilen ölgen bolup, ölgen eydiz bimarlirining arisidiki 15 mingi yünnen, Uyghur éli we gu'angshida iken. (Peride)