Xitayda eydiz késellirining yérimi dora bilen teminleshke érishelmigen

B d t we dunya sehiye teshkilati seyshenbe küni doklat élan qilip, b d t teripidin yolgha qoyulghan eydiz késellirini dora bilen teminlesh programmisi xitayda toluq ijra qilinmighanliqini bildürdi. Doklatta eskertishiche, xitayda eydiz késellirining aran yérimi eydiz dorisi bilen teminleshke érisheligen.

B d t eydiz yardem programmisi we dunya sehiye teshkilati, xitay boyiche eydiz wirusi bilen yuqumlan'ghuchi 840 ming kishi we eydiz késili bilen resmiy aghrighan 78 ming bimarning eydiz dorisigha éhtiyaj ikenlikini bildürdi.

Xitay 2005 - yilning axirlirighiche 30 mingdin 50 mingghiche bolghan eydiz bimari üstidin dawalash élip bérishni pilanlighan bolsimu, lékin junggo eydiz késilini kontrol qilish we mudapi'e körüsh merkizining eskertishiche, 2005- yili 6 - ayghiche aran 15ming 500 kishini eydiz dorisi bilen teminliyeligen.

B d t eydiz yardem programmisi we dunya sehiye teshkilati doklatta, eydizning 42 % i zeherlik chékimlikni okul qilip urush yoli bilen yuquwatqanliqini eskertip, " emma jinsiy yol bilen yoqush we anidin baligha tarqilish nisbiti köpiyiwatidu. Ayallarning eydiz wirosi bilen yuqumlinish xewpi kücheymekte," dep körsetti.

Doklatta eskertishiche, "pakitlar yuqumlinishning omumyüzlük tüs éliwatqanliqini ispatlimaqta " iken. Doklatta Uyghur aptonom rayoni, yünnen, gu'angshi, sichüen, gu'angdunglar xitay boyiche eydiz késili eng köp tarqalghan ölke we rayonlar, dep tilgha élindi we eydiz késellirining 65 % din köpreki bu rayonlargha tarqalghanliqini bildürdi. Doklatta, xitay da'irilirini eydizge qarshi "memliket boyiche omumyüzlik we uzun muddetlik tedbir"élishqa chaqirghan. (Erkin)