Xitayda 18 neper eydiz bimarlirigha tölem heqqi bérilidighan boldi

• 
  2006-12-05

Xitayning xéy lungjyang ölkiside, 18 neper eydiz bimarlirigha jemi 20 milyon xelq puli tölem bérilidighan boldi.

Fransiye agéntliqining bu heqte bergen xewiridin melum bolushiche, bu 18 neper eydiz bimarlirining 15i eydiz wirosini özige doxturxanida qan bérish jeryanida yuqturiwalghanlar iken hemde ularning arisidiki3 eydiz késilini öz ayallirigha yuqturghan, hetta biri 5 yashliq balisigha yuqturghan iken.

Xitay kündülük gézitide bérilgen bu heqtiki melumatta éytilishiche, bu 18 neper eydiz bimarlirining her birige bérilidighan tölem heqqi 200 ming yü'en bolup, ular yene her ayda 3000 yü'endin ozuqlinish puligha ige iken.

Béyjingdiki eydiz pa'aliyetchisi xujya ependi " eydiz bimarlirigha tölem heqqi bérilish, bu heqiqeten ademni xoshal qilidighan bir ish, lékin xitay hökümiti dawamliq quruq wede bérishke amraq bolghanliqtin, ularning bu qétimqi wediside turush yaki turmasliqigha yenila éniq bir nerse dégili bolmaydu " dep bildürdi.

Roytis agéntliqining bildürishiche, 1990 ‏- yillarda, xitayda minglighan on minglighan namrat déhqanlar qan sétish arqiliq eydiz késilini özlirige yuqturiwalghan. Xitay hökümiti qan sétish herikitini téxi bu yil béshida resmiy men'i qilghan. . (Méhriban)