Хитайда 18 нәпәр әйдиз бимарлириға төләм һәққи берилидиған болди


2006.12.05

Хитайниң хей луңҗяң өлкисидә, 18 нәпәр әйдиз бимарлириға җәми 20 милйон хәлқ пули төләм берилидиған болди.

Франсийә агентлиқиниң бу һәқтә бәргән хәвиридин мәлум болушичә, бу 18 нәпәр әйдиз бимарлириниң 15и әйдиз виросини өзигә дохтурханида қан бериш җәрянида юқтуривалғанлар икән һәмдә уларниң арисидики3 әйдиз кесилини өз аяллириға юқтурған, һәтта бири 5 яшлиқ балисиға юқтурған икән.

Хитай күндүлүк гезитидә берилгән бу һәқтики мәлуматта ейтилишичә, бу 18 нәпәр әйдиз бимарлириниң һәр биригә берилидиған төләм һәққи 200 миң йүән болуп, улар йәнә һәр айда 3000 йүәндин озуқлиниш пулиға игә икән.

Бейҗиңдики әйдиз паалийәтчиси хуҗя әпәнди " әйдиз бимарлириға төләм һәққи берилиш, бу һәқиқәтән адәмни хошал қилидиған бир иш, лекин хитай һөкүмити давамлиқ қуруқ вәдә беришкә амрақ болғанлиқтин, уларниң бу қетимқи вәдисидә туруш яки турмаслиқиға йәнила ениқ бир нәрсә дегили болмайду " дәп билдүрди.

Ройтис агентлиқиниң билдүришичә, 1990 ‏- йилларда, хитайда миңлиған он миңлиған намрат деһқанлар қан сетиш арқилиқ әйдиз кесилини өзлиригә юқтуривалған. Хитай һөкүмити қан сетиш һәрикитини техи бу йил бешида рәсмий мәни қилған. . (Меһрибан)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.