Хитай өзиниң тунҗи әйдиз кесилидин мудапиә көрүш бәлгилимисини елан қилди

Америка авазиниң хитай дөләт ишлири кабинетиниң учуридин нәқил кәлтүрүшичә, хитай һөкүмити тунҗи қетим әйдиз кесилидин мудапиә көрүш вә контрол қилиш чарә-тәдбирлирини елан қилған болуп, буниңда һәр дәриҗилик һөкүмәтләрниң әйдиз кесилигә гириптар болғанларниң һоқуқиға дәхли-тәрүз қилмаслиқи һәмдә бу кесәлгә гириптар болған йеза аһалилири вә иқтисадий қийинчилиқи барларға бикарлиқ дора бериши бекитилгән.

Мәзкур бәлгилимидә йәнә әйдиз кесилигә гириптар болғучиларниң чарә қоллинип, униң башқиларға юқмаслиқиниң алдини елишиниң лазимлиқи һәмдә қәстән бу кесәлни һәр хил усул билән башқиларға юқтурмаслиқи бәлгиләнгән.

Хәвәрдә көрситилишичә, мәзкур бәлгилимә 3-айниң 1-күнидин етибарән әмәлгә ашурилидикән.

Хитай һөкүмитиниң ашкарилишичә, өткән йили хитайда 650 миң адәм әйдиз кесилигә гириптар болған, әмма тәһлилчиләр бу санниң әмәлийәттә техиму көп болуши мумкинликини көрсәтмәктә. Уйғур елиму әйдиз кесили әң көп тарқалған районларниң бири болуп, буниңдики асасий сәвәб бу йәргә хитай аққунлири вә хитай содигәрлириниң көпләп келиши һәмдә әхлақсизлиқ қилмишлири вә зәһәрлик чәкимликниң ямриши қатарлиқлар икән. (Үмидвар)