Xitay özining tunji eydiz késilidin mudapi'e körüsh belgilimisini élan qildi

Amérika awazining xitay dölet ishliri kabinétining uchuridin neqil keltürüshiche, xitay hökümiti tunji qétim eydiz késilidin mudapi'e körüsh we kontrol qilish chare-tedbirlirini élan qilghan bolup, buningda her derijilik hökümetlerning eydiz késilige giriptar bolghanlarning hoquqigha dexli-terüz qilmasliqi hemde bu késelge giriptar bolghan yéza ahaliliri we iqtisadiy qiyinchiliqi barlargha bikarliq dora bérishi békitilgen.

Mezkur belgilimide yene eydiz késilige giriptar bolghuchilarning chare qollinip, uning bashqilargha yuqmasliqining aldini élishining lazimliqi hemde qesten bu késelni her xil usul bilen bashqilargha yuqturmasliqi belgilen'gen.

Xewerde körsitilishiche, mezkur belgilime 3-ayning 1-künidin étibaren emelge ashurilidiken.

Xitay hökümitining ashkarilishiche, ötken yili xitayda 650 ming adem eydiz késilige giriptar bolghan, emma tehlilchiler bu sanning emeliyette téximu köp bolushi mumkinlikini körsetmekte. Uyghur élimu eydiz késili eng köp tarqalghan rayonlarning biri bolup, buningdiki asasiy seweb bu yerge xitay aqqunliri we xitay sodigerlirining köplep kélishi hemde exlaqsizliq qilmishliri we zeherlik chekimlikning yamrishi qatarliqlar iken. (Ümidwar)