Хитай, террорчилиққа қарши туруш вә топилаңдин мудапиәлиниш әтрәтлирини қурди

Хитай даирилири йеқинда хитайдики 36 шәһәрдә террорчилиққа қарши туруш вә топилаңдин мудапиәлиниш алаһидә сақчи әтрәтлирини тәсис қилди.

Ройтерс агентлиқиниң хәвәр қилишичә, хитай асаслиқи, дөләт ичидә күнсайин көпийиватқан һәр хил намайиш вә топилаңлар сәвәбидин, шундақла дуня олимпик тәнһәрикәт йиғининиң алди - кәйнидә террорлуқ һәрикәтләрниң йүз беришиниң алдини елиш мәқситидә бу органларни қурған.

Ройтерс агентлиқи хәвиридә йәнә, хитайниң ғәрбий шималидики бир қисим уйғур мусулманлириниң мустәқил шәрқий түркистан дөлитини қурушни истәйдиғанлиқини, һәмдә һәр қайси кишилик һоқуқ тәшкилатлириниң хитайни, ‘хәлқара террорчилиққа қарши уруштин пайдилинип, уйғурларни бастуриватиду дәп әйибләйдиғанлиқини язған.

Гәрчә хәвәрдә қайси шәһәрләрдә бу әтрәтләрниң қурулғанлиқи тәпсилий тилға елинмисиму, әмма хенән өлкисиниң җеңҗу шәһиридә 500 кишилик әтрәтниң қурулғанлиқи мәлум болди. Өткән йили ноябирда бу йәрдики туңган мусулманлири билән сақчилар оттурисида тоқунуш йүз берип, 7 киши өлгән вә 42 киши яриланған иди.

Буниңдин сирт, хитайда йеқинқи бир нәччә йиллардин буян һәр хил қаршилиқ намайишлири арқа-арқидин йүз берип кәлди. Шундақла статистикиға қариғанда, пүтүн хитай бойичә өткән йилиниң ичидила 74 миң қетим намайиш йүз бәргән һәмдә буниңға қатнашқан кишиләрниң сани 3 милйон 7 йүз миңдин ашқан. (Пәридә)