Xitay, térrorchiliqqa qarshi turush we topilangdin mudapi'elinish etretlirini qurdi

Xitay da'iriliri yéqinda xitaydiki 36 sheherde térrorchiliqqa qarshi turush we topilangdin mudapi'elinish alahide saqchi etretlirini tesis qildi.

Roytérs agéntliqining xewer qilishiche, xitay asasliqi, dölet ichide künsayin köpiyiwatqan her xil namayish we topilanglar sewebidin, shundaqla dunya olimpik tenheriket yighinining aldi - keynide térrorluq heriketlerning yüz bérishining aldini élish meqsitide bu organlarni qurghan.

Roytérs agéntliqi xewiride yene, xitayning gherbiy shimalidiki bir qisim Uyghur musulmanlirining musteqil sherqiy türkistan dölitini qurushni isteydighanliqini, hemde her qaysi kishilik hoquq teshkilatlirining xitayni, ‘xelq'ara térrorchiliqqa qarshi urushtin paydilinip, Uyghurlarni basturiwatidu' dep eyibleydighanliqini yazghan.

Gerche xewerde qaysi sheherlerde bu etretlerning qurulghanliqi tepsiliy tilgha élinmisimu, emma xénen ölkisining jéngju shehiride 500 kishilik etretning qurulghanliqi melum boldi. Ötken yili noyabirda bu yerdiki tunggan musulmanliri bilen saqchilar otturisida toqunush yüz bérip, 7 kishi ölgen we 42 kishi yarilan'ghan idi.

Buningdin sirt, xitayda yéqinqi bir nechche yillardin buyan her xil qarshiliq namayishliri arqa-arqidin yüz bérip keldi. Shundaqla statistikigha qarighanda, pütün xitay boyiche ötken yilining ichidila 74 ming qétim namayish yüz bergen hemde buninggha qatnashqan kishilerning sani 3 milyon 7 yüz mingdin ashqan. (Peride)