Xitayning intérnétni tosush üchün qurghan "Altun qalqan qurulushi" ning mahiyiti


2006-04-10
Share

Xitay hökümitining uchur qurulishliri xitayda hazir " altun baj qurulushi" , " altun kart qurulushi " we " altun qalqan " qurulushi" dep atalghan 3 chong qurulush pilani bar bolup bularning arisida, " altun kard qurulushi" xitayning ikkinchi ewlat éléktironluq puqralar kinishkisini muqimlashturush qurulushi, " altun baj qurulushi" bolsa mexsus baj oghrilirigha taqabil turush qurulushi , " altun qalqan qurulushi " mexsus intérnét tor betlirini tosush üchün qurulghan qurulush bolup hésablinidiken.

Altun qalqan qurulishining aqa körünishi we hazirqi haliti

5 ‏- April küni xitay jama'et xewpsizlik ministirliqi teripidin échilghan axbarat élan qilish yighinida, xitayning " altun qalqan qurulushi " ning mahiyiti alahide otturigha qoyulghan . Xitay jama'et xewpsizlik ministirliqi pen ‏- téxnika bölümining emeldarliri " altun qalqan " qurulushni peqet ichki jehettila ishlinidighan , tashqi dunya intérnét tor béti bilen alaqisi bolmighan sistéma " dep jakarlash bilen bir waqitta, xitay merkez maliyisining mezkur qurulush üchün tunji qétimdila 800 milyon somdin artuq meblegh salghanliqini hemde bu pul arqiliq xitaydiki 8 chong matériyal menbeliri statistika ambirining omumiy qorulushini berpa qilmaqchi bolghanliqini bildürgen .

Hazir xitay jama'et xewpsizlik ministirliqi ige bolghan éléktironluq hésablash mashinisining sani 640 mingdin ashqan bolup, mezkur éléktironluq mashinilar her xil türge ayrilip , nopus uchurliri , jinayiy ishlar uchurliri , aptomobil we chégridin kirip ‏-chiqishni bashqurush qatarliq 23 séstimining yolgha qoyulushi üchün ishlitilip kelmekte . Xitay hökümiti teripidin bérilgen melumatta körsitilishiche, xitay jama'et xewpsizlik ministirliqi intérnét tor bétidin paydilinish arqiliq pash qilghan délolar sani omumiy délo sanning 20% tidin ashqan bolup, saqchilar xizmitining ünümlük bolushini zor derijide östürgen . Lékin shundaq turuqluq xitay jama'et xewpsizlik ministirliqining emeldarliri mezkur qurulushni peqet ichki jehettila ishlinidighan , tashqi dunya intérnét tor béti bilen alaqisi bolmighan sistéma dep jakarlighan .

"Altun qalqan" qurulishining oynawatqan roli

Munasiwetlik mutexessisler " altun qalqan " dep atalghan bu qurulushning asasiy wezipisi intérnét tor betlirini nazaret qilish we kontrol qilish , u hazirqi zaman uchur erkinlikige pütünley qarshi yolda méngiwatqan sistéma " dep körsetmekte .

Amérikida turushluq intérnet torbetlirining tosulup qélishini tetqiq qilish xizmiti bilen shughullinidighan téxnik nazaretchi xé ependining melum qilishiche , xitay hökümiti intérnét torbetlirini tosush üchün " altun qalqan qurulishi" gha özliri ashkarilighandinmu zor derijide meblegh salghan . Gerche xitayda intérnét tor betlirining peyda bolghinigha téxi emdi 10 yildek bolghan bolsimu, eng deslepte uninggha xitay penler akadimiyisi mes'ul idi, uzun ötmeyla pochta‏- télégraf arqiliq saqchilar bashqurudighan boldi . Shuning bilen ular " siké " qatarliq shérketler arqiliq nurghun qimmet bahaliq eswablarni sétiwélishqa bashlidi. Emeliyette bu xil eswablarni adettiki döletlerning sétip alalishi nahayiti teske toxtaydu . Lékin xitay hökümiti nurghun ademlerni ishqa sélish arqiliq bu qimmet bahaliq eswablarni qolgha keltürdi hemde 24 sa'et nazaret qilish xizmitini bashliwetti.

"Altun qalqan qurilishi" toghrisidiki mulahiziler

Radi'omizning ziyaritini qobul qilghan amérikida turushluq intérnét torbetlirining tosulup qélishini tetqiq qilish xizmiti bilen shughulliniwatqan téxnik nazaretchi xé ependining bildürüshiche , " altun qalqan qurulush " i peqet xitay hökümitining téxnik jehette intérnét tor betlirini nazaret qilidighan we tosudighan tedbiri bolup, xitay hökümiti buningdin bashqa yene , intérnét tor betlirige taqabil turushta téximu köpligen qanun we memuriy chare - tedbirlerni qollinishqa bashlighan . Démek xitayda hazir téxnikiliq tedbir bolupla qalmastin, yene nurghun wastilar bar . Mesilen tor bet béketliri jama'et xewpsizlik idarisigha melum qilish hoquqigha ige bolghan, herqandaq oyunchuq shérketliri we qol ‏- téléfon shirketliri qatarliq orunlar öz aldigha qanun - nizamname tüzüp chiqqan . Xitay hökümiti hetta chet'eldiki yaxu qatarliq shérketlergimu bu heqte séliq sélip, ularni mezkur tor betlerdiki bolmighur mezmunlarni tosushqa mejburlighan.

Xitay hökümitining bu toghridiki bayani

Xitay jama'et xewpsizlik ministérliqining emeldarliri xitayning " altun qalqan qurulushi" ni " dölet uchurlashturush programmisining biri, u peqet razwétka uchurini yetküzüsh we ortaq paydilinish iqtidarini yuqiri kötürüshni meqset qilghan . U peqet xitay jama'et xewpsizlik idarisining ichkiy jehette qollinidighan san ‏- sifirliq uchur bashqurush séstimisi , tashqi dunyadiki intérnét tor betliri bilen héchqandaq alaqisi yoq " dep tekitlimekte . Lékin köpligen mutexessisler " xitay saqchiliri altun qalqan qurulushi arqiliq xelqning intérnét tor betliride erkin pikir bayan qilishini qattiq nazaret qilip kontrol qilmaqta . Bundaq qilish hazirqi zaman uchur erkinlikige pütünley qarshi pozitsiyide bolghanliq " dep xitay hökümitini tenqid qilmaqta . Birleshken döletler teshkilatimu xitayning " altun qalqan qurulushi " heqqide mexsus doklat élan qilip, xitay hökümitini qattiq eyibligen.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet