Xitay amérikidin teywen'ge qoral sétip bermeslikni telep qildi

Xitayning amérikida turushluq bash elchisi ju wénchung bush hökümitidin, teywen'ge ilghar qorallar sétip bérishni toxtitishni telep qildi.

Ju winchung charshenbe küni amérikining paytexti washin'gtonda ötküzülgen bir ilmiy muhakime yighinida, amérika hökümitini teywen'ge herbiy qoral sétishni toxtitish bilen birge, teywen'ge bérilgen xata signalni bikar qilishni otturigha qoydi. Ju wénchungning éytishiche, washin'gtonning teywen mesilisini bir terep qilishi, amérika - xitay munasiwitining tereqqiyati üchün biwaste munasiwetlik mesile bolup hésablinidiken.

Amérika tashqi diplomatiye jehette, teywen bilen resmiy yosunda tashqi diplomatiye munasiwiti yoqluqini étirap qilidu. Amérika bolsa teywenni qoral bilen teminleydighan asasliq dölet bolup, amérikining "teywen munasiwetliri qanuni" boyiche amérikining eger teywen hujumgha duch kelse, teywenni qoghdashqa hemkarlishish wezipisi bar .

Xitay, izchil türde teywenni özidin ayrim turuwatqan bir ölke dep qarap, eger teywen " müsteqilliq" ni resmiy jakarlisa , teywen'ge choqum qoralliq hujum bashlaydighanliqi heqqide tehdit sélip kelmekte. Teywen prizidénti chén shüybyen bolsa"teywenning müsteqil bolush bolmasliqini teywendiki 23 milyon xelq belgileydu"dep ochuq ipade bildürmekte. (Eqide)