Xitay, amérika bilen bolghan munasiwetlirini yaxshilashni xalaydighanliqini bildürdi

Xitay tashqi ishlar ministiri li jawshing, seyshenbe küni béyjingda bergen bayanatida, xitayning iqtisadiy we siyasiy jehettin küchiyishi qoshna döletler üchün tehdit emes, eksinche qoshna döletlerning tereqqiyati üchün paydiliq, dédi

Li jawshing xitay xelq qurultiyining yilliq yéghini jeryanida ötküzgen muxbirlarni kütüwélish yéghinida, xitay hökümitining amérika bilen munasiwetlirini téximu yaxshilashni xalaydighanliqini tekitlep, gerche amérika bilen xitay otturisida soda mesilsi, teywen, kishilik hoquq qatarliq mesililerni öz ichige alghan bir yürüsh mesililerde jiddiy ixtilaplar mewjut bolsimu, emma ikki dölet hemkarlishidighan we ortaq menpe'etke ige bolghan nurghun mesililer bar. Biz munasiwetlirimizni téximu kücheytish, mewjut ixtilaplirimizni hel qilish üchün amérika terep bilen ishleshke teyyar, dédi.

Xitay tashqi ishlar ministiri bayanatida yene, iran xelq'ara atom énérgiye idarisi bilen yéqindin hemkarliship, yadro ixtilapini hel qilishi kérek, dédi.

Xewerlerge qarighanda, xitay tashqi ishlar ministiri xitay dölet re'isi xu jintawning kéler ay amérikigha qilmaqchi bolghan tunji resmiy ziyariti harpisida, amérika bilen bolghan munasiwetler toghrisida mulayim bir pozitisye tutqan bolushi mumkin. (Qanat)