Xénendiki bir yeslide qesten ot qoyush weqesi yüz bérip 3 bala öldi

Xitayning xénen ölkisidiki melum bir yeslide düshenbe küni qesten ot qoyush weqesi yüz bérip, 3 bala ölgen we 13 i yarilan'ghan.

Amérika birleshme agéntliqining xewer qilishiche, xénenning gong yi nahiyisidiki19 yashliq bey ningyang isimlik biri bu yerdiki bir yesli sinipigha kirip ishikni ichidin taqap turup, özi élip kelgen gaz qutisigha ot yaqqan. Netijide 5 yashlardiki 3 oghul bala ot apitide ölgen we 10 nechchisi yarilan'ghan.

Nöwette saqchilar bey ningyangni qolgha alghan we bu weqe üstidin tekshürüsh élip barmaqta iken. Lékin ular bu kishining néme sewebtin ot qoyush weqesini sadir qilghanliqini téxi éniqlap bolmighan. Xitaydiki mekteplerde yéqinqi yillardin buyan mushuninggha oxshash ot qoyush, oqughuchilarni görüge élish we pichaq sélishtek jinayi heriketler köpiyip qalghachqa, xitay hökümiti bu yil 3‏- aydin bashlap mekteplerge saqchilarni postqa qoyushni jakarlighan idi.

Ötken yili öktebirde bir kishi enxüydiki melum bir mektepke kirip, öyde yasalghan 6 dane tapancha bilen oqughuchilargha qaritip oq chiqarghan idi. Xitaydiki bu xil weqelerning köpünchisi kishilerning shexsiy achchighini chiqirish yaki hökümettin narazi bolush sewebidin kélip chiqidiken. (Peride)