Шәндоңдики икки чоң бихәтәр ишләпчиқириш вәқәсидә еғир өлүм йетим көрүлди

Шандоң өлкиси зупиң кәнтигә җайлашқан бир қәләй қуйма завутида 19 - авғуст күни әттигәндә қәләй еритмиси чиқип кетиш вәқәси йүз берип , 20 - авғустқичә завуттики 14 адәмниң өлүши һәм 59 адәмниң еғир ярилинишини кәлтүрүп чиқарған.

Б б с агентлиқиниң буниңға даир бәргән хәвиридә зупиң наһийисиниң һакими фән йүниң сөзини нәқил кәлтүрүшичә , яридар ишчилар наһийидики икки чоң дохтурханида қутқузмақта икән. Әмма у яридарларниң әһвали һәққидә очуқ тохтилишни рәт қилған.

Мәзкур вәқә завутида йәкшәнбә күни йәрлик вақит 8дин 10 минут өткәндә 900селсийә градуслуқ қәләй еритмиси туюқсиз тешип кетиш сәвәблик йүз бәргән. Бу чағда 82 нәпәр ишчи иш үстидә икән. Еритмә билән пар завутни бир дәмдила ис түтүн қаплиған һәмдә юқири температурида завутниң бәзи түврүклириму ерип өрүлгән.

20 - Авғуст йәнә шәндоңниң шиңтәй хуаюән кан мәһсулатлири ширкитигә қарашлиқ бир канда су бесип кетиш вәқәси йүз берип, 584 нәпәр ишчи қечип чиққан болсиму әмма 172 нәпәр ишчи кан астида қалған.

Мәзкур вәқә йүз бәргәнликигә үч күн болсиму һазирғичә бу 172 нәпәр ишчиниң һаят яки әмәслики ениқланмиған. Кан ишчилириниң билдүрүшичә канни 20 метир чоңқурлуқта су басқан. Вәқә һәққидә йәрлик даириләр америка авази радиосиға, вәқә ениқланмиғичә чәтәл мухбирлириға җаваб беришкә болмайдиғанлиқини билдүргән.

Хитай ишләпчиқириш бихәтәрликигә мәсул орунларниң елан қилишичә 2006 - йили бир йилдила иш үстидә өлгәнләр 110 миң болуп, бу күнигә 320 адәмдин тоғра келидикән.(Гүлчеһрә)