Хитай һөкүмити, хитай сақчилириниң гуаңдуңдики һәрикитини ақлиди


2006.01.16

Хитай даирилири, гуаңдуңниң сәнҗяв кәнтидә хитай сақчилириниң кәнт аһалисиниң наразилиқ һәрикитини бастуруш үчүн ток калтәклири ишләткәнликини рәт қилип, сақчиларниң намайишчиларға яхши муамилә қилғанлиқини билдүрди.

Өткән ай йәнә гуаңдуңда елип берилған намайишта сақчилар намайишчиларни оққа тутқан.Хитай һөкүмити вәқәдә үч кишиниң өлгәнликини җакарлиған. Әмма вәқә шаһитлири вә бәзи кишилик һоқуқ тәшкилатлириниң билдүрүшичә, хитай сақчилириниң намайишни бастуруши җәрянида, 20 әтрапида намайишчи өлгән. Хәлқара җамаәтниңму диққитини қозғиған бу вәқә, тйәнәнмин оқуғучилар һәрикитидин кейин, хитай бихәтәрлик қисимлири тәрипидин хитай өлкилиридә елип берилған әң чоң бастуруш һәрикити һесаблинидикән.

Сәнҗяв кәнтидики яң фамилилик бир һөкүмәт әмәлдари, ройтрес агентлиқиға бәргән баянатида, сақчилар намайишчиларға қарши қорал ишләтмиди.Намайиш җәрянида бәзи яман нийәтлик адәмләрниң сақчиларға қилған һуҗуми нәтиҗисидә бәзи намайишчилар яриланған, деди.

Хәвәрләргә қариғанда, өткән чаршәнбә күни бир нәччә йүз кишиниң һөкүмәтниң кәнт аһалисидин фабрика қуруш үчүн алған йәргә бәргән төләм пулиниң азлиқиға наразилиқ билдүрүш үчүн сәнҗяв кәнти һөкүмәт бинаси алдида топлиниши билән башланған намайиш шәнбә күнигичә давамлашқан.

Вәқә шаһитлириниң билдүрүшичә, һөкүмәт бинаси алдиға кәлгән хитай сақчилири, намайишчиларни тарқтиш үчүн ток калтәклири ишләткән.

Хоңкоң мәтбуатиниң хәвәр қилишичә, сақчиларниң намайишни бастуруши җәрянида 13 яшлиқ бир қиз қаза қилған. Лекин хитай һөкүмити мәзкур қизниң сақчиларниң наразилиқ һәрикитини бастуруши җәрянида әмәс, шәнбә күндики тоқунуштин бурун йүрәк кесәллики сәвәбидин өлгәнликини билдүрди. (Қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.