Xitay hökümiti, xitay saqchilirining gu'angdungdiki herikitini aqlidi

Xitay da'iriliri, gu'angdungning senjyaw kentide xitay saqchilirining kent ahalisining naraziliq herikitini basturush üchün tok kaltekliri ishletkenlikini ret qilip, saqchilarning namayishchilargha yaxshi mu'amile qilghanliqini bildürdi.

Ötken ay yene gu'angdungda élip bérilghan namayishta saqchilar namayishchilarni oqqa tutqan.Xitay hökümiti weqede üch kishining ölgenlikini jakarlighan. Emma weqe shahitliri we bezi kishilik hoquq teshkilatlirining bildürüshiche, xitay saqchilirining namayishni basturushi jeryanida, 20 etrapida namayishchi ölgen. Xelq'ara jama'etningmu diqqitini qozghighan bu weqe, tyen'enmin oqughuchilar herikitidin kéyin, xitay bixeterlik qisimliri teripidin xitay ölkiliride élip bérilghan eng chong basturush herikiti hésablinidiken.

Senjyaw kentidiki yang famililik bir hökümet emeldari, roytrés agéntliqigha bergen bayanatida, saqchilar namayishchilargha qarshi qoral ishletmidi.Namayish jeryanida bezi yaman niyetlik ademlerning saqchilargha qilghan hujumi netijiside bezi namayishchilar yarilan'ghan, dédi.

Xewerlerge qarighanda, ötken charshenbe küni bir nechche yüz kishining hökümetning kent ahalisidin fabrika qurush üchün alghan yerge bergen tölem pulining azliqigha naraziliq bildürüsh üchün senjyaw kenti hökümet binasi aldida toplinishi bilen bashlan'ghan namayish shenbe künigiche dawamlashqan.

Weqe shahitlirining bildürüshiche, hökümet binasi aldigha kelgen xitay saqchiliri, namayishchilarni tarqtish üchün tok kaltekliri ishletken.

Xongkong metbu'atining xewer qilishiche, saqchilarning namayishni basturushi jeryanida 13 yashliq bir qiz qaza qilghan. Lékin xitay hökümiti mezkur qizning saqchilarning naraziliq herikitini basturushi jeryanida emes, shenbe kündiki toqunushtin burun yürek késelliki sewebidin ölgenlikini bildürdi. (Qanat)