Иш ташлап намайиш қилған аққун ишчилар һуҗумға учриди


2007-07-02
Share

Гуаңдуң өлкисидики бир қурулушта ишләватқан 300гә йеқин хитай аққун ишчилар билән тоқмақ, калтәкләр билән қоралланған бир нәччә йүз киши арисида тоқунуш йүз берип 11 адәм яриланған. Униңдин башқа, бирләшмә агентлиқи 2- июл күни бәргән хәвәрдә көрситишичә, тоқунуш җәрянида 1 адәм өлгән.

Хәвәрләргә қариғанда, гуаңдуң өлкисиниң хе йүән шәһиридики бир електр истансисида ишләватқан аққун ишчилар өткән һәптә җүмә күни иш ташлап, 4 айдин буян берилмигән иш һәққини беришни тәләп қилған. Нәтиҗидә, иш ташлап намайиш қилған ишчиларға, қоллирида һәрхил шәкилдики тоқмақларни көтүрүшкән бир топ адәмләр келип һуҗум қилған.

Бир аққун ишчиниң шинхуа агентлиқиға билдүрүшичә, башта, гүрҗәк көтүрүшүп бир топ адәм кәлгән, кейин йәнә палта- пичақ вә полат туруба қатарлиқларни көтүрүшүп йәнә бир топ адәм кәлгән.

Фуйүән енергийә ширкити билән тохтамлишип гуаңдуң өлкисиниң хе йүән шәһиригә қурулуватқан су електр истансисида ишләватқан шенҗен чютйән қурулуш ширкитиниң башлиқи лю җуңчең, тоқунуш таки сақчилар нәқ мәйданға йетип кәлгүчә давам әткәнликини билдүргән болуп, униң қаришичә, йәрлик һөкүмәт фуйүән енергийә ширкити билән тил бириктүрүвалған икән.

Мәлум болушичә, ялланған бир топ кишиләр билән аққун ишчилар арисида чиққан бу тоқунушқа четишлиқи бар 4 нәпәр гумандар қолға елинған.

Кишилик һоқуқ тәшкилатларниң баянлирида көрситилишичә, һазир хитайда, намрат, чәт-яқа районлардин кәлгән 200 милйондин артуқ аққун ишчи бар болуп, улар даим, саламәтлик суғуртисиниң кәмчил болуши вә иш һәққини вақтида алалмаслиқтәк әһвалларға учрап туридикән.(Җүмә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт