Ish tashlap namayish qilghan aqqun ishchilar hujumgha uchridi


2007.07.02

Gu'angdung ölkisidiki bir qurulushta ishlewatqan 300ge yéqin xitay aqqun ishchilar bilen toqmaq, kaltekler bilen qorallan'ghan bir nechche yüz kishi arisida toqunush yüz bérip 11 adem yarilan'ghan. Uningdin bashqa, birleshme agéntliqi 2- iyul küni bergen xewerde körsitishiche, toqunush jeryanida 1 adem ölgen.

Xewerlerge qarighanda, gu'angdung ölkisining xé yüen shehiridiki bir éléktr istansisida ishlewatqan aqqun ishchilar ötken hepte jüme küni ish tashlap, 4 aydin buyan bérilmigen ish heqqini bérishni telep qilghan. Netijide, ish tashlap namayish qilghan ishchilargha, qollirida herxil shekildiki toqmaqlarni kötürüshken bir top ademler kélip hujum qilghan.

Bir aqqun ishchining shinxu'a agéntliqigha bildürüshiche, bashta, gürjek kötürüshüp bir top adem kelgen, kéyin yene palta- pichaq we polat turuba qatarliqlarni kötürüshüp yene bir top adem kelgen.

Fuyüen énérgiye shirkiti bilen toxtamliship gu'angdung ölkisining xé yüen shehirige quruluwatqan su éléktr istansisida ishlewatqan shénjén chyutyen qurulush shirkitining bashliqi lyu jungchéng, toqunush taki saqchilar neq meydan'gha yétip kelgüche dawam etkenlikini bildürgen bolup, uning qarishiche, yerlik hökümet fuyüen énérgiye shirkiti bilen til biriktürüwalghan iken.

Melum bolushiche, yallan'ghan bir top kishiler bilen aqqun ishchilar arisida chiqqan bu toqunushqa chétishliqi bar 4 neper gumandar qolgha élin'ghan.

Kishilik hoquq teshkilatlarning bayanlirida körsitilishiche, hazir xitayda, namrat, chet-yaqa rayonlardin kelgen 200 milyondin artuq aqqun ishchi bar bolup, ular da'im, salametlik sughurtisining kemchil bolushi we ish heqqini waqtida alalmasliqtek ehwallargha uchrap turidiken.(Jüme)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.