Хитай чәтәл тилидики гезит-жорналларни тосимақчи

Хитай һөкүмити йеқинда хитайниң гезит-жорнал нәшр қилип тарқитиш бәлгилимисини қоғдап, бир қисим чәтәл тилида чиқидиған гезит-жорналларни тәкшүрүп тақивитиш уқтурушини чиқарди.

Бу уқтурушни, хитайниң ахбарат нәшрият баш идариси, дөләт кабинти ахбарат ишханиси, сода министирлиқи, дөләтлик сода-санаәт мәмурий башқуруш идариси вә мәмликәтлик "сериқ китабларни тазилап, қанунсиз китабларни йоқутуш" хизмәт гуруппа ишханиси бирликтә елан қилған болуп, улар асаслиқи хитайда хизмәт қиливатқан чәтәллик оқурмәнләрни асас қилип чиқириливатқан бир қисим гезит-жорналларни тосашни нишанлиған.

Мәзкур уқтурушта йәнә, хитайда чәтәл тилида чиқирилидиған һәр қандақ гезит-жорналларниң чоқум һөкүмәт тәсдиқлиған нәшрият орунлири тәрипидин чиқирилиши һәмдә хитайниң мунасивәтлик қанун-бәлгилимилиригә қаттиқ бойсуниши керәклики тәкитләнгән.

Шундақла униңда йәнә, бу гезит-жорналларниң мәзмунлириму хитай қанунида бәлгиләнгән даиридә болиши, униңдин һалқиған һәрқандақ мәзмунларниң чәклинидиғанлиқи көрситилгән.

Хитай һөкүмитиниң чәтәл йезиқидики гезит-жорналларни тосушила әмәс бәлки хитайдики пүтүн мәтбуатқа болған контроллуқи, хәлқара җамаәт хелидин бери әйибләп келиватқан мәсилиләрниң бири. (Пәридә)