Xitay chet'el tilidiki gézit-zhornallarni tosimaqchi

Xitay hökümiti yéqinda xitayning gézit-zhornal neshr qilip tarqitish belgilimisini qoghdap, bir qisim chet'el tilida chiqidighan gézit-zhornallarni tekshürüp taqiwitish uqturushini chiqardi.

Bu uqturushni, xitayning axbarat neshriyat bash idarisi, dölet kabinti axbarat ishxanisi, soda ministirliqi, döletlik soda-sana'et memuriy bashqurush idarisi we memliketlik "sériq kitablarni tazilap, qanunsiz kitablarni yoqutush" xizmet guruppa ishxanisi birlikte élan qilghan bolup, ular asasliqi xitayda xizmet qiliwatqan chet'ellik oqurmenlerni asas qilip chiqiriliwatqan bir qisim gézit-zhornallarni tosashni nishanlighan.

Mezkur uqturushta yene, xitayda chet'el tilida chiqirilidighan her qandaq gézit-zhornallarning choqum hökümet tesdiqlighan neshriyat orunliri teripidin chiqirilishi hemde xitayning munasiwetlik qanun-belgilimilirige qattiq boysunishi kérekliki tekitlen'gen.

Shundaqla uningda yene, bu gézit-zhornallarning mezmunlirimu xitay qanunida belgilen'gen da'iride bolishi, uningdin halqighan herqandaq mezmunlarning cheklinidighanliqi körsitilgen.

Xitay hökümitining chet'el yéziqidiki gézit-zhornallarni tosushila emes belki xitaydiki pütün metbu'atqa bolghan kontrolluqi, xelq'ara jama'et xélidin béri eyiblep kéliwatqan mesililerning biri. (Peride)