Хитай һөкүмити хоңкоңниң бир мухбирини җасуслуқ қилиш билән сотлиди

Хитай һөкүмити сингапордики "боғаз вақти" гезитиниң хоңкоңда турушлуқ мухбири чин чеңни, 2000 - йилдин 2005 - йилғичә ахбарат сетивелиш вә тәйвәнгә ахбарат йәткүзүп бериш билән әйиплиди.

Шинхуа ахбарат агентлиқиниң хәвәр қилишичә, әгәр чин чеңниң җинайити муқимлашса өлүм җазасиға һөкүм қилинидикән. Чин чең бу йил 4 - айда хитай дөләт бихәтәрлик даирилири тәрипидин қолға елинған иди. Әмма чин чеңниң аяли, ериниң җасуслуқ қилғанлиқини рәт қилип, униң һәққидики әйибләшкә һәйран қалғанлиқини билдүрмәктә.

Хәлқара мухбирлар федератсийиси бу йил 5- айда баянат елан қилип, чин чеңниң қолға елинғанлиқидин пәвқуладдә биарам болғанлиқини билдүргән.

Мухбирлар федератсийисиниң башлиқи кристофир варен, хитай һөкүмитини мәтбуат әркинликини боғуш билән тәнқид қилған. Әмма хитай һөкүмитиниң зувани шинхуа ахбарат агентлиқи, чин чеңниң җинайитини иқра қилғанлиқини хәвәр қилди.

Чин чең бу йил 22 - април күни гуаңҗуда қолға елинған. Чин чеңниң аялиниң тәкитлишичә, униң йолдиши гуаңҗуға хитай компартийисиниң сабиқ секритари җав зияң тоғрисидики материялларни елишқа барған. У, илгири хоңкоңдики бейҗиңпәрәслики билән тонулған "вен хуй" гезитиниң мухбири иди. Чин чең 1989 - йили тйәнәнмен һәрикити бастурулғандин кейин мәзкур гезиттики хизмитидин истипа бәргән. (Әркин)