Xitay hökümiti xongkongning bir muxbirini jasusluq qilish bilen sotlidi
2005.08.05
Xitay hökümiti sin'gapordiki "boghaz waqti" gézitining xongkongda turushluq muxbiri chin chéngni, 2000 - yildin 2005 - yilghiche axbarat sétiwélish we teywen'ge axbarat yetküzüp bérish bilen eyiplidi.
Shinxu'a axbarat agéntliqining xewer qilishiche, eger chin chéngning jinayiti muqimlashsa ölüm jazasigha höküm qilinidiken. Chin chéng bu yil 4 - ayda xitay dölet bixeterlik da'iriliri teripidin qolgha élin'ghan idi. Emma chin chéngning ayali, érining jasusluq qilghanliqini ret qilip, uning heqqidiki eyibleshke heyran qalghanliqini bildürmekte.
Xelq'ara muxbirlar fédératsiyisi bu yil 5- ayda bayanat élan qilip, chin chéngning qolgha élin'ghanliqidin pewquladde bi'aram bolghanliqini bildürgen.
Muxbirlar fédératsiyisining bashliqi kristofir warén, xitay hökümitini metbu'at erkinlikini boghush bilen tenqid qilghan. Emma xitay hökümitining zuwani shinxu'a axbarat agéntliqi, chin chéngning jinayitini iqra qilghanliqini xewer qildi.
Chin chéng bu yil 22 - april küni gu'angjuda qolgha élin'ghan. Chin chéngning ayalining tekitlishiche, uning yoldishi gu'angjugha xitay kompartiyisining sabiq sékritari jaw ziyang toghrisidiki matériyallarni élishqa barghan. U, ilgiri xongkongdiki béyjingperesliki bilen tonulghan "wén xuy" gézitining muxbiri idi. Chin chéng 1989 - yili tyenenmén herikiti basturulghandin kéyin mezkur gézittiki xizmitidin istipa bergen. (Erkin)
Munasiwetlik maqalilar
- Xitay chet'el tilidiki gézit-zhornallarni tosimaqchi
- Xitayda radi'o - téléwiziye istansilirining chet'el metbu'at organliri bilen hemkarlishishi cheklendi
- Ding juw shehirining sabiq partkom sékritari tupraqni qanunsiz igiliwélish sewebidin qolgha élindi
- Xitayda tor ponkitlirini tizimgha aldurush telep qilindi
- Sin'gapor muxbiri xitayda qolgha élindi