Кишилик һоқуқни көзитиш тәшкилати тибәт вә уйғур елигә қаритилған ахбарат чәклимисини тәнқид қилди
2007.11.23
Кишилик һоқуқни көзитиш тәшкилати доклат елан қилип, хитайниң олимпик мәзгилидә ахбарат әркинликини кеңәйтиш бәлгилимиси елан қилишиға қаримай, тибәт вә уйғур елиниң йәнила чәтәллик мухбирларға чәкләнгән район болуп келиватқанлиқини тәнқид қилди. Доклатта йәнә, хитайда йәрлик даириләр лүкчәкләрни ялливелип, мухбирларға тәһдит салидиған әһваллар көпийишкә башлиғанлиқини илгири сүргән.
Бу мунасивәт билән алдинқи күни вашингтондики бир йиғинда кишилик һоқуқни көзитиш тәшкилати асия бөлүминиң тәтқиқатчиси фелин кейн, "шинҗаң билән тибәт бурунқиға охшашла чәкләнгән район. Чәтәллик мухбирлар бу җайларға бериш үчүн хитай ташқи ишлар министирлиқиниң тәстиқини елиш керәк. Буни тәстиқлашқа наһайити узун вақит һәм мурәккәп рәсмийәтләр кетиду " дәп көрсәтти.
Йиғинда лос - ангелес гезитиниң хитайдики мухбири җеймиз ман, йеқинқи 25 йилдин бери чәтәллик мухбирларниң уйғур или вә тибәт һәққидики хәвәрлиридә азийиш һәм чекиниш болғанлиқини әскәртип, " мән бурун хитайда мухбирлиқ қилған йиллиримда өзәм ялғуз шинҗаң вә тибәткә барған идим. Лекин кейинки чағларда бу қийинлишип кәтти. Болупму 80 - йилларниң ахирлиридин башлап хитай һөкүмити бу районларда ахбарат чәклимисини күчәйтти," дәйду.
Кишилик һоқуқни көзитиш тәшкилати доклатта, хитай олимпик комитети, хәлқара олимпик комитети вә хитайдики һәр дәриҗилик һөкүмәтләрдин чәтәллик мухбирларниң ахбарат әркинликигә һәқиқий түрдә капаләтлик қилиш, хитай мухбирлириниму бу әркинликтин бәһриман қилишни тәләп қилған. Хитай һөкүмити өткән йилниң ахири бәлгилимә чиқирип, чәтәллик мухбирлар келәр йили 10 - айға қәдәр хитайниң һәр қайси өлкә- шәһәрлиридә рухсәтсиз хәвәр бәрсә, халиған кишини зиярәт қилса болиду, дәп җакарлиған иди. (Әркин)
Мунасивәтлик мақалилар
- Чегрисиз мухбирлар тәшкилати саркозидин хитай зияритидә кишилик һоқуқни оттуриға қоюшни тәләп қилди
- Хитай " җуңгониң сиясий партийә түзүми" намлиқ ақ ташлиқ китабини елан қилди
- Мухбирлар байрими күнидә чәтәл мухбирлириниң зиярәт қилиши чәкләнди
- Дуня кишилик һоқуқ көзитиш тәшкилати хитайда ахбарат әркинлики изчил қамал қилиниватқанлиқини оттуриға қойди
- Америка қирғизистандин сүйқәсткә учриған мухбирниң қатилини ениқлашни тәләп қилди
- Кишилик һоқуқни күзүтүш тәшкилати хитайни вәдисигә әмәл қилмиди дәп әйиблиди
- Президент буш, хитайни техиму көп әркинликкә дәвәт қилди
- Атақлиқ кино чолпини ричард гер, хитайни кишилик һоқуқ мәсилисидә очуқ болушқа чақирди
- Әнгилийә минситири, хитай һөкүмитидин кишилик һоқуқ хатирисини яхшилишини тәләп қилди