Ахбарат әркинлик тәшкилати хитайға киргүзүлмиди


2007-12-10
Share

Дуня чегрисиз мухбирлар тәшкилатиниң дүшәнбә күни билдүргәнлиригә қариғанда, уларниң хитайға кириши чәкләнгән болуп, уларниң хитайға кириш үчүн сунған виза илтимаслири рәт қилинған.

Чегрисиз мухбирлар тәшкилатиниң бәш нәпәр әзаси, бүгүн йәни 10-декабир дуня кишилик һоқуқ күни, хитай һөкүмитиниң хоңкоңға җайлашқан иш беҗириш орниниң алдиға йиғилип намайиш елип барди.

Намайишчилар қоллирида олимпик бәлгисиниң орниға қолға селинидиған койза сүрити алмаштурулған байрақларни көтүрүшүп вә майкиларни кийишип , хитайниң мәзкур қилмишиға қарита өз наразилиқини ипадиләшти.

Чегрисиз мухбирлар тәшкилатиниң баш катипи роберт менардниң франсийә агентлиқиға билдүргәнлиригә қариғанда, уларниң икки күн илгири хоңкоңда хитайға кириш үчүн сунған виза илтимаси хитайниң хоңкоңдики иш беҗириш орни тәрипидин рәт қилинған. Менард әпәнди: "хитай болса мухбирлар үчүн әң чоң түрмә. Олимпик йеқинлишивалиду , буниңға чарә қилишниң яхши пәйти" дәйду.

Мушу мунасивәт билән чегрисиз мухбирлар тәшкилати баянат елан қилип хитайниң чегрисиз мухбирлар тәшкилатиниң бәзи әзалирини қара тизимликкә киргүзгәнликини шуниң билән бирликтә хитайниң йәнә кишилик һоқуқ паалийәтчилири вә бәзи чәт әл мухбирлири һәққидә олимпик келиштин илгири нурғун материялларни топлаватқанлиқини көрситип: " хитайниң бундақ қилиши олимпик йиғинида тәнқидчиләрни чәттә қалдуруш пиланиниң испати" дәп оттуриға қойди.

Бу йил авғустта, хитай сақчилири бейҗиңда ахбарат әркинлики тоғрисида намайиш қилған чегрисиз мухбирлар тәшкилатиниң төт нәпәр әзасиниң ятиқини ахтурған вә намайиш һәққидә хәвәр бериш үчүн нәқ мәйданға кәлгән 10 нәччә нәпәр мухбирини муһасиригә алған иди. Чегрисиз мухбирлар тәшкилати, хитайда ахбарат әркинликиниң үзлүксиз дәпсәндә қиливатқанлиқини билдүрмәктә. (Җүмә)‏

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт