Axbarat erkinlik teshkilati xitaygha kirgüzülmidi

Dunya chégrisiz muxbirlar teshkilatining düshenbe küni bildürgenlirige qarighanda, ularning xitaygha kirishi cheklen'gen bolup, ularning xitaygha kirish üchün sun'ghan wiza iltimasliri ret qilin'ghan.

Chégrisiz muxbirlar teshkilatining besh neper ezasi, bügün yeni 10-dékabir dunya kishilik hoquq küni, xitay hökümitining xongkonggha jaylashqan ish béjirish ornining aldigha yighilip namayish élip bardi.

Namayishchilar qollirida olimpik belgisining ornigha qolgha sélinidighan koyza süriti almashturulghan bayraqlarni kötürüshüp we maykilarni kiyiship , xitayning mezkur qilmishigha qarita öz naraziliqini ipadileshti.

Chégrisiz muxbirlar teshkilatining bash katipi robért ménardning fransiye agéntliqigha bildürgenlirige qarighanda, ularning ikki kün ilgiri xongkongda xitaygha kirish üchün sun'ghan wiza iltimasi xitayning xongkongdiki ish béjirish orni teripidin ret qilin'ghan. Ménard ependi: "xitay bolsa muxbirlar üchün eng chong türme. Olimpik yéqinlishiwalidu , buninggha chare qilishning yaxshi peyti" deydu.

Mushu munasiwet bilen chégrisiz muxbirlar teshkilati bayanat élan qilip xitayning chégrisiz muxbirlar teshkilatining bezi ezalirini qara tizimlikke kirgüzgenlikini shuning bilen birlikte xitayning yene kishilik hoquq pa'aliyetchiliri we bezi chet el muxbirliri heqqide olimpik kélishtin ilgiri nurghun matériyallarni toplawatqanliqini körsitip: " xitayning bundaq qilishi olimpik yighinida tenqidchilerni chette qaldurush pilanining ispati" dep otturigha qoydi.

Bu yil awghustta, xitay saqchiliri béyjingda axbarat erkinliki toghrisida namayish qilghan chégrisiz muxbirlar teshkilatining töt neper ezasining yatiqini axturghan we namayish heqqide xewer bérish üchün neq meydan'gha kelgen 10 nechche neper muxbirini muhasirige alghan idi. Chégrisiz muxbirlar teshkilati, xitayda axbarat erkinlikining üzlüksiz depsende qiliwatqanliqini bildürmekte. (Jüme)‏