Хитай йәрлик мухбирлиқ понкитлирини тәртипкә салмақчи

Әнглийә BBC агентлиқиниң хәвәр қилишичә, хитай ахбарат- нәшрият баш мәһкимиси, һәр дәриҗилик гезитләрниң йәрлик мухбирлиқ понкитлирини тәртипкә селиш һәққидә уқтуруш чиқарди.

Буниңдики мәқсәт, хитайниң бәзи ахбарат органлириниң йәрликтики мухбирилирида көрүлүватқан башқиларниң мәхпийәтликини ашкарилаш тәһдити билән пул-мал үндүрүвелиштин ибарәт мухбирлиқ кәспий әхлақиға мухалип қилмишларниң алдини елиш икән.

Хитай ахбарат- нәшрият баш мәһкимиси, хитайдики бәзи ахбарат агентлиқлириниң йәрликтики мухбирлиқ понкитлирида хизмәт қиливатқан айрим хадимлириниң хәвәр ишләш вә мухбирлиқ қилиш намида пайда үндүрүвелишни мәқсәт қилиш хаһишлирини тәнқит қилған.

Йеңи бәлгилимидә, пәқәт һәқиқий мухбирлиқ кинишкиси бар хадимларниңла ахбарат хизмити билән шуғуллиниши бәлгилинип, йәрлик партийә ‏- һөкүмәт органлири мухбирлиқ понкитлириниң башлиқини бәлгиләйдиған, мухбирлиққа салидиған вә мухбирлар ахбарат билән мунасивәтсиз ишлар билән шуғуллинидиған хаһишларни чәкләш оттуриға қоюлған.

Бу йил январда "хитай сода гезити" ниң шәншидики мухбирлиқ понкитиниң әзаси лән чеңҗаң хизмәтдеши билән тәййүәндики бир қанунсиз көмүр канни зиярәт қилиш җәрянида кан мәсули қатарлиқ кишиләр тәрипидин уруп өлтүрүлгән иди.

Тәййүән сақчи даирлириниң ениқлап көрситишичә, юқириқи икки мухбир кан мәсулидин пул үндүрүвалмақчи болған һәм көмүр кан мәсулиниң билдүрүшичә, бу мухбирларниң кинишкисидә хитай ахбарат- нәшрият баш мәһкимисиниң тамғиси йоқ болуп канчилар бу мухбирларни "ялған мухбир" дәп һес қилишқан икән. (Җүмә)