Yaponiyining ikki yoluchilar ayropilanining shangxey ayrodromigha qonushi ret qilindi

Xitayning shangxey shehirige qarap uchqan yaponiye hawa yollirining bir transport ayropilani bilen bir yoluchilar ayropilani jüme küni shangxey pudung xelq'ara ayrodromigha qonmaqchi bolghanda xitay hawa qatnash da'irilirining ret qilishigha uchridi.

Yaponiye hawa yolliri shirkiti bayanatchisi, xitay da'iriliri yaponiye ayropilanlirining élan qilinmighan sewebler tüpeylidin shangxeyge qonushini ret qilghanliqini bildürdi. Mezkur bayanatchisining eskertishiche, eyni chaghda xitaylar shangxeyde herbiy manéwir élip bériwatqan bolushi mumkin. Weqedin kéyin yaponiye ayropilanliri tokyogha qaytip kétishke mejbur bolghan. Roytérs axbarat agéntliqi shu künki xewiride shangxey ayrodromining jüme küni aldin ala élan qilinmighan herbiy manéwir sewebidin 2 sa'et taqalghanliqini bildürdi. Roytérs axbarat agéntliqining eskertishiche pudung xelq'ara aldurdumi hawa kontrol merkizining ismini ashkarilashni xalimaydighan bir emeldari, ayrodrom xitay merkizi herbiy ishlar komitétining buyruqigha bina'en taqalghanliqini, ayrodromning taqilish sewebini "bu dölet mexpiyetliki" dep tekitligen.

Xongkong metbu'atliri ayrodromning herbiy manéwir sewebidin taqalghanliqini bildürmekte. Lékin xitay da'iriliri ilgiri bu yerde manéwir ötküzülidighanliqini élan qilip baqmighan. (Erkin)